Page 27 - AWEMAINTA

AWEMainta Diamars, 27 Juni 2017 27

8 Hoben a huramenta como miembro di Parlamento Hubenil di Aruba

DIABIERNA ultimo den sala di Parlamento di Aruba a tuma lugar
e huramentacion di 8 miembro di Parlamento Hubenil.
Parlamento Hubenil ta un organisacion cu ta enfoca riba e desaroyo
personal y social di e hobennan di Aruba.
E hobennan cu a huramenta diabierna anochi aki ta representa EPI,
Colegio Arubano y Pro Famia Feliz. Representando EPI a huramenta:
Noami Albertus, Marie-Jaindrah Gomez, David Quant, Arelys Tromp
y Maxromy Brown.
Representando Colegio Arubano a huramenta: Gilia Croes y Faridi
Dorff y representando Pro Famia Feliz: Steve Geerman.

Cada un di e 8 hobennan a pasa den un trayectoria largo di prepara-
cion cu ta ensera entre otro: Debate, cursonan, lecturanan y diferente
encuentro. E tabata un anochi yena cu emocion den presencia di
famia, miembronan actual, staff y demas invitado, e 8 hobennan aki
a huramenta y asina tuma e rol di ta un ehempel pa otro hobennan
den comunidad.

Directiva di Parlamento Hubenil ta hopi contento y orguyoso di e 8
hobennan aki, mirando cu nan tin un futuro prometedor nan dilanti.y
cu esaki Parlamento Hubenil kier a manda un invitacion personal
n’e hobennan di Aruba entre e edad di 14 pa 23 aña cu ta bay scol
of cu ta forma parti di un organisacion pa tuma contacto cu nos na
588-6860 of email nos na youthparliamentaruba@gmail.com y asina
tambe forma parti di e team dinamico aki y tambe crece como un
hoben professional.

Tambe nos kier a extende un invitacion na tur hoben cu ta interesa,
pa join nos den nos conseho general diabierna awor 30 di juni 2017.
Pa mas informacion keda pendiente riba nos facebook page cual ta
‘Youth Parliament Aruba’.