Page 56 - MIN.TTC MAY 27

Ta bay bin un legislacion pa controla e cantidad di
propiedadnan all inclusive

Publication: Wednesday, 27 May 2015. Categoria: General

Minister Otmar Oduber

ORANJESTAD (AAN): Minister Otmar Oduber papiando riba e fenomeno di all inclusive a bisa
cu su ministerio a bin ta hibando e discusion aki ya caba pa casi 2 aña. El a indica cu riba nibel
global e tendencia ta cu turismo ta canando mas y mas den e direccion di all inclusive.
Cadenanan grandi manera Hyatt ta asocia y tin un linea di all iclusive, Marriott ta bayendo den e
mesun direccion tambe. E mesun clientela di e cadenan grandi ta pidiendo pa all inclusive.

Maneho di Minister Otmar Oduber cual a worde sosteni door di un mocion cu a pasa
unanimamente den Parlamento ta pa percura pa tin legislacion caminda cu ta bay pone un
vergunningstelsel riba operacion di all inclusive na Aruba, esaki debi cu actualmente no tin
legislacion cu ta spera e diferente operacionnan cu tin manera ta all inclusive y EP.

A traha un rapport cu a worde presenta for di october aña pasa y recientemente a expande e
rapport aki. Ta trata di un actividad cu ta genera hopi cash y esnan cu ta opera den all inclusive
hopi biaha tin cash disponibel pa cumpra propiedadnan y e menaza tey na Aruba cu esaki por
tuma lugar tambe y door di esey kier bin cu un tipo di vergunning pa tanto operacionnan nobo
como esunnan existente. E mandatario a bisa cu kier hiba un discusion cu AHATA unda ta
stipula cu cierto porcentahe di e metodo di haci negoshi por ta conforme un all inclusive of
operacionnan similar cu ta existi na e momentonan aki.

Minister Oduber a bisa cu e menaza di all inclusive ta uno cu ta menaza nos isla, pasobra e
riesgo mas grandi ta netamente mas grandi cerca esnan cu tin un vergunning caba y cu por worde
cumpra over. Por a mira kico a sosode cu un Westin Hotel cu RIU a tuma over. Radisson ta otro
propiedad cu tabata cla pa worde cumpra door di un all inclusive y den esaki Minister Otmar
Oduber a gradici famia Carlson riba cual a haci un apelacion y nan no a bende cu e companianan
all inclusive y a bende cu e compania local. E grupo Barcelo cu ta un all inclusive tambe a
cumpra minoria di Occidental y Minister Oduber lo reuni cu alto ehecutivonan dentro di 2 siman
unda el lo haya un splicacion di kico e plannan ta y splicanan kico ta e maneho cu tin riba e
plano aki pa futuro.

Ministerio di Turismo ta kere cu Aruba tin e privilegio di ta un destinacion cu cambernan limita
y nos producto ta uno di calidad halto. Esey kiermen cu nos por dicidi pa controla e cantidad di
propiedadnan all inclusive. E maneho aki a worde sosteni tambe door di e mocion aproba door di
e 21 miembronan di Parlamento.

http://www.diario.aw/2015/05/ta-bay-bin-un-legislacion-pa-controla-e-cantidad-di-propiedadnan-all-
inclusive/