Page 5 - AM210709

AWEMainta.com DIABIERNA 9 JULI 2021| 5
Entrada hudicial na dos casino ilegal

na Aruba, a confisca varios articulo

DIARANSON den oranan di anochi, Polis, RST,
Departamento di Impuesto, Douane hunto cu
algun otro departamento gubernamental a tene
un entrada hudicial na dos sitio, relaciona cu
practica di casinonan ilegal.
E practica di casino ilegal a bira hopi popular,
durante e pandemia, cu e casinonan na Aruba
mester a keda sera pa un varios dia.
E entradanan hudicial a tuma lugar na un
localidad den Dakota Shopping Paradise y e
otro localidad ta na Sabana Blanco, panort di e
Pompstation.

N’e localidad den Dakota Shopping Paradise,
Fiscal di Ministerio Publico tambe tabata
presente, el a drenta paden, pero no a topa cu
ningun persona cu lo por tabata hunga wega di
placa, pero si nan a tuma varios articulo den
beslag.

Tur cos a cuminsa cu un tip cu autoridad
a haya y despues di algun luna di
investigacion extenso a haci e entrada
hudicial aki.

N’e mesun momento e Fiscal tambe a
presenta n’e localidad na Sabana Blanco.
Un compania di yabi mester a wordo pidi
pa habri e porta pa autoridad por a drenta
y p’asina confisca varios articulo relaciona
cu e practica di casino ilegal.
N’e localidad na Sabana Blanco autoridad
a bin topa cu un cantidad di mesa y Fiscal
a duna ordo pa confisca tur e mesanan.
E accion grandi aki a inicia den oranan
tempran di anochi y autoridad a haya
cooperacion di Personal di CEA y Team di
Aresto.