Page 60 - MIN TTC - MAY 21,2015

Publication: Wednesday, 20 May 2015. Categoria: General

ORANJESTAD (AAN): Minister Otmar Oduber a reuni siman pasa cu San Nicolas Business Association, San Nicolas
Bar Association y diferente otro comerciante di Pariba. Durante e reunion aki na O’Niel Caribbean Kitchen a
brainstorm y presenta e diferente plannan cu tin pa haci di San Nicolas e di dos capital turistico di Aruba y centro
cultural di nos isla.
Durante e reunion aki a splica esnan presente riba e proyectonan cu ta andando caba y Minister Oduber a pone
atencion special riba e compromiso, e sosten y e forma proactivo cu mester tey di tur actor involucra cu ta
importante pa por atrae turistanan pariba.
Minister Otmar Oduber a mustra enfaticamente cu mester cuminsa un caminda y e ta cla hunto cu Gobierno pa
ehecuta e vision di haci di San Nicolas nos di dos capital turistico cu enfoke riba cultura. El a agrega cu ta importante
no solamente pa e turista, pero tambe pa nos localnan conoce nos cultura y pa disfruta di nos cultura y no tin mihor
lugar pa realiza esaki cu San Nicolas.
Tambe e mandatario a scucha e retonan cu e comerciantenan ta experiencia diariamente, mientras cu a enfatisa riba
e ideanan di e comerciantenan mes y con por saca probecho di esakinan. Igualmente a pone enfasis riba e
envolvimento di artistanan, di cultura unda cu a papia por ehempel di arte publico cu lo bin na San Nicolas, e
proyecto di Murals cu lo worde ehecuta na october y tambe esculturanan cu lo por bin.
Un punto importante cu a bin dilanti, tanto di banda di e comerciantenan como di Minister ta e aspecto di Valero.
Nan ta di acuerdo cu no mester keda enfoca riba e posibilidadnan cu tin of no tin cu Valero, pero enfoca riba
desaroyo di e capital cultural di Aruba cu ta San Nicolas y asina mantene e energia y enfoke cu mester pa sigui bay
dilanti.
E reunion aki a bay den hopi bon ambiente y por bisa cu e tabata uno frutifero. Minister Otmar Oduber kier a gradici
propietario di O’Niel Caribbean Kitchen pa por a acomoda e reunion den corto tempo y a felicite pa ta un di e
comerciantenan cu a tribi di tuma e iniciativa, ta proactivo y kere den e concepto di San Nicolas.

http://www.diario.aw/2015/05/exitoso-reunion-entre-minister-otmar-oduber-y-comerciantenan-di-
pariba-di-nos-isla/