Page 65 - TTC july 17 2015

DIP mester tene miho cuenta cu diferente factor prome cu
kita tereno

Publication: Friday, 17 July 2015. Categoria: General

Minister Oduber:

ORANJESTAD(AAN): Ultimamente atrobe DIP ta den noticia en conexion cu nan accion di
kitamento di derecho riba uso di huurgrond otorga pa planta y cria. A puntra e mandatario
encarga cu sector primario con ta manehando e situacion y e kehonan for di famianan cu tin e
terenonan pa hopi decada caba – algun entre 60 pa 100 aña, kende awo ta worde confronta cu un
carta standard di DIP cu nan a perde e tereno.

Minister Otmar Oduber a splica cu el a combersa riba e asunto aki cu Minister Sevinger di
infrastructura caba y a mustr’e riba e preocupacionnan cu ta biba cerca dje y su ministerio.
Minister Oduber y Santa Rosa (LVV) ta bin trahando hopi duro cu un presupuesto hopi limita
riba e sector aki pa e ultimo cinco pa seis aña y por wak resultado y desaroyonan hopi positivo.

Minister Oduber a bisa cu hasta Prome Minister Mike Eman ta bishitando diferente cunucu rond
Aruba y ta comenta cune tocante e progreso grandi cu e ta wak den e sector primario.
“Mi ta spera toch, y ainda, cu por tin un recapacitacion riba e parti aki pa sigura cu en todo caso
no ta kita tereno for di hendenan cu porta pa motibo di e secura aworaki, of pa motibo otronan
ajeno no por ta produciendo, no por ta plantando na e momentonan aki, cu nan ta sali
naturalmente “dupe” of cu nan tin e consecuencia di loke ta tumando luga,” Minister Oduber a
subraya.

E mandatario a splica cu ta berdad cu tin un escaces di tereno pa traha cas, y realidad ta cu tin
terenonan pa agricultura cu tambe no ta worde uza optimalmente, pero pa e control y
identificacion corecto di terenonan cu no ta worde uza mas y di berdad lo por tuma back lo ta
bon pa DIP traha mas di cerca cu Santa Rosa.

Na varios ocacion Minister Oduber a notifica su homologo tocante e situacion unda cu no ta
envolve Santa Rosa y tampoco no ta consulta of uza e comision instala pa Ministerraad via di un
decreto ministerial pa e asuntonan aki. E mandatario a expresa cu e ta lamenta cu DIP no ta
consulta e comision cu tin hende cu sa of por haya confirmacion di ken ta agricultor of ta cria
bestia y con activo nan ta.