Page 81 - Binder1

Tin lista di espera di como 5 aña pa transplante di riñon

Publication: Friday, 13 March 2015. Categoria: General

ORANJESTAD (AAN): Malesa di riñon ta sigui aumenta na Aruba y pa cu e motibo aki
Comision di Riñon di IMSAN a organiza un siman di diferente actividad pa conscientisa pueblo
tocante e malesa aki.

Segun Parlamentario Lorna Varlack, un di e actividadnan cu a atrae hopi hende tabata e actividad
cu a tuma lugar diaranson anochi na IMSAN unda charlanan a worde duna pa cu e causanan y e
tratamento di malesa di riñon.

Charlanan interesante a worde duna door e.o. dr. Eddy Falconi, señora Marlene Illidge, señora
Clarita Bryson y otronan. Malesanan cu por haci of cu ta haci daño na nos riñonnan ta lo
siguiente: 1. Diabetes Mellitus, 2. Presion halto, 3. Malesa congenital, 4. Abuso di
alcohol/remedi, 5. Obesidad.

Dr. falconi tambe a papia tocante di e sintomanan di e malesa di riñon p.e. perdida di apetit,
nausea y sacamento, cansancio, temblamento di musculo, curpa ta hincha, color por cambia y
holor di urina.

Durante e anochi interesante aki a mustra e diferente ekipo cu ta haci dialyse y a splica e
diferente metodonan di dialyse. A papia tambe tocante transplantacion di riñon unda e lista di
espera ta hopi largo, e tempo di espera ta core den mas of menos 5 aña y unda tambe tin e risico
cu e curpa no ta acepta e organo nobo aki. Tin diferente instancia cu ta traha hunto pa cu e
conscientisacion di pueblo pa cu diferente malesa cu ta ataca nos comunidad y esey ta algo di
aprecia. Awe tambe Parlamento durante e reunion publico di “Hedging” a para keto un rato pa
hunto cu otro instancianan rond Aruba bebe un glas di awa den cuadro di e conscientisacion di e
malesa di riñon. Asina a mustra con importante e ta pa bebe hopi awa diariamente y fuera di esey
controla regularmente cerca bo dokter di cas, haci ehercicio y come saludabel.
http://www.diario.aw/2015/03/tin-lista-di-espera-di-como-5-ana-pa-transplante-di-rinon/