Page 67 - Min Vos, 13 May 2015

Comparti

Ya pa varios aña caba e unidad di Salubridad y Cuido di EPI ta organisa un evento special pa celebra Dia
di Enfermeria, cu enfoke riba un topico di interes general cu tin di haci cu nan futuro profesion como
dunadonan di cuido profesional den nos comunidad.
E tema cu e studiantenan den nan di tres aña di estudio a scoge e aña aki pa elabora riba dje tabata
“Alcohol y Droga”. E studiantenan a haci tur e sondeo necesario pa presenta e tema y a invita FADA pa
participa den e programa y asina subraya prevencion y conscientisacion pa cu uzo, mal uzo y abuso di
droga y alcohol.
Minister dr. Alex Schwengle, encarga cu e cartera di Salubridad, a splica cu e parti di alcohol
specialmente ta uno cu e sa basta di dje y cu durante di su estudio el a skirbi algun articulo tocante di
entre otro alcohol relaciona cu e funcionamento den famia (alcohol en gezinsfunctioneren).
El a bisa su interes den e tema ta debi na e echo cu el a lanta den un bario unda cu desafortunadamente
tabatin hopi uzo di alcohol y droga y cu ta danki na un bon educacion di cas cu e mes a keda riba bon
caminda.
Minister Schwengle a subraya cu e tema cu e studiantenan a scoge ta hopi importante pa Aruba, como cu
e consumo di alcohol y droga ta halto. E minister a expresa cu el a keda contento cu con nan a organisa e
dia, el a haya nan presentacion uno “tremendo” y el a gradici e studiantenan pa a invit’e pa participa.
El a comenta cu e presentacion di FADA tambe tabata sumamente bon y cu aunke e organisacion no ta
cay bao di su cartera e ta bay papia cu nan pa yuda haci mas fuerte e posicion di FADA pa nan yuda mas
den educacion di e comunidad, particularmente e hubentud cu mester mas atencion.
Un actividad cu a capta hopi atencion durante di e evento tabata e “bril” di FADA, cu nan a pone e
hobennan y docentenan bisti pa experencia con un persona su bista y sentido di orientacion ta wordo
influencia ora cu nan ta bao di influencia di droga y/of alcohol.
E zorgmanager di salubridad y servicio, Donna Canhigh a expresa cu e ta wak un interes pa enfermeria
cu ta creciendo, sigur compara cu tempo cu e mes a cuminsa su carera den añanan 80. Tambe el a
remarca cu e ta satisfecho pa wak cu tin mas interes pa e celebracion di e dia y siman di enfermeria, unda
cu for di comunidad mes ta dunando e profesionalnan aki mas balor.
Loke si e ta sinti, Canhigh a bisa, ta un envolvimento mas intensivo den procesonan cu desicionnan den
cuido mester of ta wordo tuma, pero hasta esey ta mehorando si e compara e situacion di añanan 80.
E mensahe mas importante di e dia, manera e studiantenan mes a pone ta refleha cu un persona mester
cuida su mes, ta atento y tuma bon decision, pasobra bida no ta algo cu por “rewind”, pues ora cu cosnan
pasa no por “rewind” y haci nan di nobo pa drecha nan.