Page 6 - UTILITIES 15 JUNE 2017

AWEMainta Diahuebs, 15 Juni 2017 13

Jacky van Putten (POR):

CAFT ta bati alarma p’esey mester

saca tur man for di e papa deportivo

POCO dia pasa CAFT a saca un comunicado unda nan ta conclui cu Gobierno actual
no ta cumpliendo cu loke nan mester pa asina controla y baha e gastonan. Mas ainda ta
premira un situacion dificil financieramente pa nos isla otro aña debi na tur e debenan cu
tin cu wordo paga.
Pa Green Corridor y Hospital so mester bin 90 miyon acerca. Esaki kiermen cu e pueblo
di Aruba ta haya nan mes den un preta enorme cu nan finanza. Pasado a mustra cu ora
Gobierno kier baha nan gasto e promenan cu lo wordo afecta ta net esnan cu mas mes-
ter di dj’e. Fundacionnan y deporte lo bay ta e promenan cu lo wordo afecta, segun
Jacky van Putten.

E proyectonan di bario, social y cultura, musica lo wordo sacrifica p’asina
e otro gastonan iresponsabel por wordo paga. E Plataforma Forsa
Nobo, POR ta di opinion cu mester traha riba fondonan indepedi-
ente cu lo percura cu instancianan importante di nos comunidad
por sigui funciona.

Nos lider di partido Otmar Oduber a realisa esaki
cu un fondo pa turismo cu awor ta draai positivo y
hasta ta duna placa na Gobierno. E concepto aki no
ta nada nobo pa deporte, p’esey den añanan 80 mi
defunto tata Roy van Putten hefe di IDEFRE hunto
cu diputado di deporte e tempo ey Remy Zaandam
a funda Lotto pa Deporte. E unico meta tabata pa
proteha fondonan independiente strictamente pa
deporte, cultura y educacion fisico.

Pero manera tur cos aki na Aruba unda tin placa tin
mannan cu kier manipula den e papa. Asina nos por
a mira cu e metanan a wordo cambia, fondonan pa
deporte a bay pa otro cos, diferente escandalo rond
di e fondo y na final a entrega un gran parti di e placa
cu nos mester pa nos deporte na Canada pasobra nos
ta tur hipoteca, van Putten ta splica.

Mester bin claridad den maneho di deporte p’asina
esnan cu mas mester di dj’e lo wordo beneficia. Mes-
ter primeramente saca tur man for di e papa.
Personan cu ta liga na Gobierno cu interes personal
mester wordo saca. No por ta cu placanan grandi ta
bay solamente pa algun deporte cu tin madrina. Nos
mester proteha e muchanan cu menos recurso, nos
barionan y nos scolnan. Ta bunita cu algun atleta
privilegia ta biaha tur rond di mundo, pero e grupo
grandi di atletanan no tin ni bala pa hunga.
Deporte na Aruba a conoce un decadencia ultimo
añanan na unda diferente Minister y aliadonan ta
haci y desahaci sin ningun plan di maneho, van Put-
ten ta mustra.

Mester ruim op de boel y trece vision nobo, nos mes-
ter percura cu e fondo bira saludabel atrobe, percura
cu interes personal wordo elimina y percura pa tur
deporte por wordo practica libremente, Jacky van
Putten ta conclui.