Page 62 - MIN.ON APRIL 22

Universidad di Aruba cu ahusta di dos programa di
Facultad di Arte y Ciencia

 Apr 22nd, 2015
 Local

A ahusta exigencianan pa sigui dos programa di Facultad di Arte y Ciencia, FAS, di Universidad
di Aruba. Despues di hopi analisis y investigacion riba e mihor practicanan pa permiti
studiantenan sigui un programa na nivel bachelors cu mas garantia di exito, hunta di facultad di
FAS a ahusta e exigencianan riba e testnan TOEFL y SAT. TOEFL ta e asina yama ‘ Test of
English as a Foreign Language’ mientras cu e SAT ta e ‘Scholastic Aptitude Test.’
Te cu aña escolar coriente (2014/2015) tabata exigi tanto e TOEFL como e SAT pa studiantenan
por sigui e programanan di Social Work and Development y Organization, Governance &
Management, irrespecto cua ta e trayectoria di enseñansa secundario. Tanto esnan cu a gradua
HAVO/VWO y tambe a caba EPI nivel 4, mester a pasa e dos testnan aki cu un resultado
minimo di 550 pa e TOEFL y 1200 pa e SAT.
SAT
Sinembargo entrante aña academico 2015-2016, graduadonan di HAVO/VWO, sea di Colegio
San Nicolas, de Schakel College of Colegio Arubano no mester di pasa e SAT. Tampoco
graduadonan di EPI nivel 4 ta mara mas na e SAT pa drenta e dos programanan di FAS.
Tampoco ta exigi e SAT mas di graduadonan di scolnan HAVO/VWO di otro paisnan den
Reino, igual cu esnan cu tin un diploma MBO di nivel 4.
Tur otro studiante cu no a caba e tipo di enseñansa secundario of profesional intermedio ta rekeri
pa tuma e SAT. Ta trata aki di graduadonan di Ibero American High School, International
School of Aruba, y esnan cu a caba un enseñanza secundario segun sistema Mericano of otro.