Page 12 - AM210203

12 AWEMainta Diaranson, 3 Februari 2021

Dia 1 di febrüari Wardakosta a celebrá su di 25 aniversario

DIALUNA 1 di febrüari 2021 Wardakosta a celebrá su di 25 aniversario.
Durante un seremonia simpel, pa motibu di e medidanan di Covid-19, a

conmemorá e hecho akí hunto cu personal di Wardakosta y un grupo chikito di
invitado n’e puntonan di sosten di Wardakosta na Còrsou, Aruba, St. Maarten
y na Hato.
E Director di Wardakosta, Frank Boots a duna un speech durante di e
ceremonia caminda el a reflehá bèk riba e historia di e organisacion, e futuro
di e organisacion y tambe su aprecio p’e trahadornan di e organisacion unico
akí den Caribe.

Na aña 1993 a start cu e idea pa un Wardakosta den Caribe caminda a pone e
promé ‘piedranan’ pa por cuminsa forma e organisacion. A dura te cu decèmber
1995, na momento cu a firma e ‘Voorlopige regeling van de instelling van de
Kustwacht’ cual tabata e documento oficial promé cu e ‘Rijkswet Kustwacht’
cu ta vigente actualmente.
E fecha oficial cu finalmente a establecé e organisacion cu tabata yama n’e
momento ey ’de Kustwacht voor de Nederlandse Antillen en Aruba’ a bira 1
febrüari 1996. E ‘Rijksministerraad’ na Hulanda a bay di acuerdo na 1995

pa integrá e unidadnan di Defensa y pone nan na disposicion di Wardakosta.

Te cu awe e unidadnan di Defensa y personal di Defensa ta integrá den e
organisacion. E personal di Defensa ta traha conhuntamente cu e personal
local cualnan ta personal civil hunto cu e propio unidadnan di Wardakosta.
Apesar di e diferencianan den e organisacion, Wardakosta ta funcioná como
un organisacion y ta actua como un organisacion hudicial riba e islanan.

E aña akí, e aña di e 25 aniversario ta marca e comienso di un era nobo p’e
organisacion di Wardakosta. Un aña cu cambionan intensivo cu lo nificá un
crecemento p’e organisacion cual lo ser realisá danki n’e sosten financiero di
Hulanda. Como tal, Wardakosta lo por funcioná mas eficiente pa hunto cu su
partnernan den e cadena hudicial protehá e frontera di e islanan.

Na final di e speech di e Director di Wardakosta, cu a ser transmití via di
un ‘livestream’ p’e puntonan di sosten, tabata momento pa corta e bolo di
e 25 aniversario di Wardakosta. E personal y e grupo chikito di invitado

presente por a gosa di un pida bolo y un bebida pa celebrá e dia memorabel
aki. Henter aña 2021 lo ta un aña festivo p’e organisacion, teniendo cuenta
cu e medidanan vigente di Covid-19, den cual lo celebrá cu tur e personal, e
‘stakeholdersnan’, e partnernan den e cadena hudicial y cu e comunidadnan.
Esaki como muestra di aprecio y danki n’e sosten duna na Wardakosta den e
último 25 añanan.