Page 35 - awem

AWEMainta Dialuna, 11 April 2016 35

Fundacion CINEARUBA
6 aña contribuiendo n’e
desaroyo di talento y
cine local

DIA 10 di april 2010, Fundacion

CINEARUBA a keda funda cu e obhetivo
di desaroya un cultura audiovisual. Bao
di e nomber Fundacion AVI, e fundacion
a realisa diferente proyecto y tayernan
multidisciplinario.
E proyecto mas galardona tabata e
musical film ‘Abo So’ cual a duna inicio
na un movemento nobo di cine local.
Tambe e fundacion a lansa e campaña
cultural ‘Papiamento mi lenga materno’
cu a causa un impacto den nos
comunidad.
E fundacion semper a crea proyectonan
cu a stimula y a envolvi hobennan den
activadadnan sano y creativo.
Durante ehecucion di cada proyecto e
hobennan semper a traha di serca cu
profesionalnan cu a sa di duna bon guia
y cu a percura pa transpasa conecemento
n’e generacion nobo.

E fundacion ta celebrando 6 aña di
existencia mirando bek atras 6 aña
di exito stimulando arte y cultura,
colaboracion colectivo y desaroyo di
talento. E 6 añanan no lo tabata posibel
sin e ayudo y e sosten di diferente
persona y instancianan cu a sostene e
proyectonan y e fundacion. Fundacion
CINEARUBA kier duna danki na tur
esnan cu a yuda y cu a contribui di un
manera of otro n’e exito di e fundacion.

Fundacion CINEARUBA su obhetivo pa
2016 ta pa establece su propio centro
ofreciendo recurso, facilidad y experticio
pa yuda hobennan y comunidad crea nan
propio pelicula.
E centro lo fungi como un plataforma
audiovisual unda personanan por
conecta y colabora cu otro.
E centro ta un proyecto comunitario cu
e proposicion pa desaroya talentonan
nobo capaz di documenta bida na Aruba
den diferente manera.
Pa mas informacion tocante Fundacion
CINEARUBA bishita www.cinearuba.
com