Page 8 - flip min.vos

AWEMainta Dialuna, 9 Februari 2015 19

Aruba ta gana premio
Adrian Awards

A logra premio di plata y brons pa campañanan
excepcional

ARUBA ta sigui ricibi premiacion internacional
p’e manera diferente y diversifica cu ta proyecta y
promove nos isla. Nos isla a ricibi no un, sino dos
premio special pa medio di e “Adrian Awards”.
Pa 58 aña caba, HSMAI Adrian Awards ta honra
mentenan briyante y bon practica den hospitalidad,
biahe y mercadeo relaciona cu turismo.
E competencia ta inclui e mihonan di mundo den e
area di promocion, relacionnan publico, y mercadeo
digital, cu ta enfoca specificamente riba e industria
di hospitalidad, biahe y e industria turistico.
Aruba a gana e premio di Adrian Award brons
y plata, dunando reconocimento n’e trabaonan
Digital y di print tradicional. Cu e promocion digital
di Devin Supertramp (famoso riba You Tube), a
logra premiacion plata y cu e campana imprimi riba
papel pa atrae e bishitante afluente a logra gana
brons.
E categorianan ta enfatisa e excelencia di trabao
cu a hinca den e produccion di Devin Supertramp
su video-on-line, y cu esaki esfuersonan pa atrae
e biahero hoben afluente pa Aruba. Pero tambe e
sistema yamativo, innovativo y creativo cu a aplica
pa atrae e hoben ehecutivo pa nos isla a resalta.
Aruba ta un di e islanan den Caribe cu e porcentahe
mas halto di “Return visitors”, esta turistanan cu
ta bolbe nos isla pa mas di 10 of te hasta 35 of mas
aña. Devin Supertramp a crea un imagen diferente
pa Aruba, un destinacion mas hoben, un aventura
unico, esaki pa medio di 6 video, cada un di 26
minuut. Cada presentacion a capta un Aruba yena cu
aventuranan exitante cu e hoben ehecutivo por gosa
di dje. Di otro banda e meta principal di e campaña
imprimi riba papel ta atrae e bishitante afluente.
A concentra riba loke e isla tin como caracteristica
nan fuerte, refleha den un ‘setting’ excepcional.
A haci uzo di e proyeccion di spa, arte culinario y
experiencianan diferente.
Aruba Tourism Authority ta masha orguyoso cu e
dos premionan aki. Sin duda nan ta subraya e bon
imagen y percepcion cu mundo henter tin riba e
forma con Aruba Tourism Authority ta ehecuta
esfuersonan pa mercadea nos isla lo mihor posibel.
E hecho cu cifranan ta sigui ta fuerte y cu turismo
ta desaroya y crece anualmente ta prueba cu Aruba
Tourism Authority ta ehecutando un vision exitoso.
E “HSMAI Adrian Awards Dinner Reception” lo
tuma lugar dia 23 di februari 2015 na New York.