Page 37 - MIN ARENDS

Figuranan fuerte den MEP a bandona partido y ta mirando
den otro direccion

Monday, 30 January 2017 22:29
Comparti

MEP mester bay mira bon con nan mester move pa gana eleccion 2017. Ya caba e lider di MEP
a menciona cu riba nuebe candidato di eleccion anterior lo no ta riba lista.

Cuater sigur tin confirma cu a bandona e partido y ta algun candidato cu ultimo eleccion na
2013 a saca basta voto. Pa logra convence e votador no ta facil. Bo mester hiba un bon
campaña y esey ta net loke e cuater candidatonan aki a haci tambe. Caranan fuerte di MEP no
tey mas cu e partido. Esey ta duna un indicacion cu nan a wordo lubida of nan a mira cu nan no
ta fit mas den MEP. Ademas di esey nan a mira e politica diferente cu tin awendia y cu no ta
bay cu e sistema cu MEP ta hibando. Nan ta prefera di distancia nan mes di MEP. Notable ta cu
tin di e candidatonan cu tabata fuerte den MEP canando cerca awe di e gobierno di AVP. Un
candidato manera Ronwayne Kock den eleccion 2013 a saca 77 voto. A mire publicamento
pone su aprecio pa minister Paul Croes di AVP y cu Paul Croes por conta cune. Tambe a mira
Gerrick Croes, cu ta un di e candidatonan nobo di MEP, cu tambe a logra ultimo eleccion na
2013 un total di 350 voto. Gerrick Croes algun dia pasa tabata riba e foto cu Prome Minister
Mike Eman cu henter su famia durante un accion di barrio cu cendemento di luz den barrio. Un
otro candidato cu tambe a bandona MEP ta Arondino Croes. Ultimo eleccion den 2013
Arondino Croes a logra haya 364 voto mientras na 2009 el a haya 289 voto.Desde 1997
Arondino tabata afilia na MEP y a representa MEP den Parlamento tambe. E ta un di e
campañadornan cu ta drenta diferente cas den Piedra Plat y haci un bon papel pa MEP cu su
forma di hiba campaña durante cinco eleccion tras di otro. Pa awe e bandona e fila geel y ta
mira den direccion diferente ta duna un inidicacion fuerte cu algo ta robez cu MEP. Un di
cuater candidato cu ta un cara importante pa MEP den Noord ta Carl Giel. Carl Giel tambe
tabata fuerte y a cana cas pa cas den Noord pa asina logra haya un bon sosten cu 465 voto den
eleccion di 2013. Den 2009 e tabata tin 575 voto. Si mira e coriente di e candidatonan aki y
otronan cu ainda no ta wordo menciona, claramente por mira cu nan ta sinti mas na cas cu e
partido cu ta gobernando. Pesey mes e sorpresanan por ta hopi pa proximo eleccion. Semper
partidonan den opocision tin bon chens di crece den cada eleccion pero ultimo eleccion esey
no a keda demostra. Awor mas ta mira tambe cu algun candidato fuerte no tey mas y kier sigui
den politica activo no necesariamente riba lista. Dimes si nan no tey mas nifica tambe cu nan
famia no tey mas cu MEP. Ta votonan nobo cu MEP mester bay busca pa 22 di September