Page 6 - AWEM 06-Mrt-2015
P. 6
6 AWEMainta Diabierna, 6 Maart 2015
Parlamentario Wever-Croes (MEP) ta
Ta desmenti e acusacionnan
lansa riba dje di parti di
lider di fraccion Herde
(AVP)
Skirbi pa N.G. Croes
AYERA mainta durante conferencia di prensa, lider di fraccion
di Arubaanse Volkspartij (AVP) Rene Herde a bisa cu su colega
Evelyn Wever-Croes (MEP) ta bisa pueblo pa no paga belasting,
mientras ta trata di belasting cu e mes Wever-Croes no a zorg pa
cobra tempo cu e tabata hefe na Departamento di Impuesto (DI).
E desinformacion aki a wordo desmenti dor di Wever-Croes, por
medio di un entrevista telefonico, kende a yama e comportacion
di Herde un “reaccion infantil”. Ta trata aki di derechonan di cada
ciudadano, Wever-Croes a splica, no pa bisa hende pa no paga
belasting. “Hende mester sa nan derecho.”
Segun Wever-Croes, e no ta di opinion cu ciudadanonan no mester
paga nan belasting.
“Ami ta ultimo hende pa bisa esey,” Wever-Croes a bisa. Ademas,
e Parlamentario a splica, e conseho cu e ta dunando publicamente
no ta algo contra ley.
De hecho, fuentenan independiente y fidedigno for di DI ta confir-
ma loke Wever-Croes ta informando pueblo. Esta, cu si un cobransa
ta mas di 10 aña bieu, sin cu a ricibi un ‘dwangschrift’ durante e
temporada aki, DI no tin base legal pa manda un ‘dwangschrift’
nobo of busca manera pa cobra e persona concerni.
E debe na belasting ta keda existi si, y lo wordo ‘verrekend’ na
cualkier momento cu e persona tin di haya placa bek for di DI.
Loke Wever-Croes a informa tambe, ta cu e mes a traha na DI 12
aña pasa, y pues, e cobransanan cu ta trata di nan actualmente,
ta data for di e periodo despues cu e a traha na DI.
Mas ainda, durante e periodo cu Wever-Croes a traha na DI, e
tabata traha den Inspectie, y no Ontvanger, cual t’e departamento
responsabel pa cobransanan.
Esta, e acusacion cu Herde ta duna, relaciona cu cobransanan cu
Wever-Croes mes a keda sin cobra, ta completamente infunda,
ya cu Wever-Croes no tabata ni sikiera traha den e departamento
concerni den e acusacion aki. E hecho aki tambe a ser confirma
p’e fuentenan for di DI.
