Page 38 - flip min.on

CEDEHM a celebra Dia Internacional di Hende Muhe

W ednesday, 11 March 2015 20:10
Comparti

Desde 27 di augustus 2010 a funda Centro pa Desaroyo di Hende Muhe (CEDEHM), un departamento
separa cu ta resorta directamente bou di Minister di Enseñansa y Famia. E centro tin como meta pa haci
investigacion, tuma iniciativa, determina agenda y crea condicionnan riba terenonan relevante.
Tur esaki e centro ta desea di haci pa hende muhe den nos comunidad y fungi como punto di contacto pa
organisacionnan internacional y nacional y como vocero, specialmente di e hende muhe Arubiano.
Special pa celebracion di dia Internacional di hende Muhe, e organisacion a invita varios orador entre
otro Eugene Clementia, Jessy Granviel y Isa Brown cu a declama poesianan bunita en cuanto e dia
special aki. Sheila Maduro di Directie Onderwijs a subraya e importancia di Lifelong Learning y lo sigui
improvisa pa trece mas curso pa duna tur hende muhe oportunidad pa sigui improvisa, mehora y sigura
nan futuro.
“Inverti den bo educacion, esaki ta algo cu ningun hende por kita di bo. Sea pa mehora bo curiculo pa un
miho posicion na trabou, pa cambia di ramo of explora otro horizonte”, asina Sheila Maduro a sigui
splica. A elabora tambe riba Enseñansa pa Empleo, hende muhe mester por comprende cu ey nan lo por
yuda nan logra metanan cu un dia tabata un soño y awor por bira realidad. “No laga esaki keda na un
soño haci esaki un realidad”, Jahaira Valdez, trahado social di CEDEMH ta subraya.
Un proyecto cu sigur lo mira luz durante e proximo lunanan ta Carrousel na e scolnan. Ta bishita e
scolnan y suministra mayornan y alumnonan cu informacion di organisacionnan pa yuda e alumno
alcansa su metanan y caba su scol. “Tin bes un hoben mester di un empuhe den e direccion corecto pa e
logra alcansa di termina su estudio y ta dor di papia, conseha y determina puntonan cu ta stroba den
comunicacion entre hoben y mayor, bo ta logra masha hopi mes” Jahaira Valdez a sigui splica.
“Nos ta contento cu e sosten cu nos departamento ta haya for di Minister Michelle Hooyboer–Winklaar
cu tin confianza den nos ideanan y mi ta sigur cu aunke e ta den exterior, su presencia ta ser sinti awe
entre nos tur” Sandra Brown director di CEDEMH a enfatisa mientras e ta scucha e mensahe di Minister
riba e screen.
Minister Michelle Hooyboer–Winklaar ta na New York durante e di 59th sesion di “Commission on the
Status of Woman” na United Nations y a laga un bunita mensahe di conscientisacion y palabranan atento
pa esunnan presente. Durante e anochi tabatin diferente stand cu artesania y tambe FUMEDA
(Fundacion Mujeres Emprenedoras de Rep. Dom en Aruba) a duna un bunita mensahe.
E celebracion di Dia Internacional di hende Muhe a subraya e importancia di bisa No na tur forma di
violencia contra hende muhe y e enfoke riba norma y balornan y estudio, na unda oportunidad igual ,
crea condicionnan economico, cultural y social oportuno entre e muhenan a keda grandemente
demostra. Pabien CEDEMH y tur presente pa bunita anochi comparti.