Page 7 - Min.On 11 March 2015

20 AWEMainta Diaranson, 11 Maart 2015

Aruba Lions Club

A honra
damanan di
comunidad

ARUBA Lions Club, un club di servicio na comunidad, no

solamente ta trahando riba nan proyecto di mas grandi pa recauda
fondo, pero tambe a celebra un fecha special den fin di siman “
Dia di Hende Muher”. Den combersacion cu Randolph Vrolijk,
miembro di Directiva di Aruba Lions Club, el a splica cu den
cuadro di celebracion di e fecha internacional aki, Aruba Lions
Club a dicidi di honra damanan cu a haci hopi den comunidad,
pero tambe nan miembronan femenino. “E intencion ta pa trece
nan den luz publico, locual hopi biaha nos no sa haci.”

Riba e fecha aki, esta diadomingo, e miembronan di Aruba Lions
Club a sali tempran bishitando na prome lugar Cas Alegria, cas
di anciano na Cura Cabay, unda tabatin mas cu 25 dama cu ta
kedando ey. Hunto cu Aruba Lions Club a entrega un rosa na
cada un. Despues a bishita e miembronan femenino cu tin hopi
aña activo den club. “E forma aki ta algo nobo cu Lions Club a
bini cune e aña’ki. E tabata un exito total y otro aña nos lo sigui
cune, pa honra e ser femenino cu ta hopi special.”
Di e forma aki tambe ta siña conoce e club hopi bon y dado
momento a bira emocional ora cu a sinta combersa cu e damanan.

Na momento di a pasa di cas pa cas, tur e miembronan hunto a
bay den un bus. Cada dama honra a ricibi un rosa y na mesun
momento a scucha nan pensamento riba diferente topico.
Di otro banda, Vrolijk tambe a menciona cu benta di e rifa di cas
di Lions ta bayendo bon. E sorteo mes lo tuma lugar dia 30 di
april. E miembronan ta bendiendo ticket riba caya, na tur skina
di Aruba. Cu e rifa aki, cu tin un cas como premio, ta recauda
fondo pa sigui brinda e servicio di calidad na comunidad,
principalmente p’esnan mas vulnerabel na comunidad cu ta bati
na porta di e club.

“Sin e contribucion aki di comunidad e ta bira dificil pa Aruba
Lions sigui brinda e mesun cantidad y calidad di servicio na e
comunidad Arubano.”E cas di Aruba Lions ta situa na Tanki
Leendert Residence, banda di Aruba Car Colour. E cas ta
practicamente cla y den april, lo tin un “open house” pa interesa
e hendenan mas pa cumpra un of mas ticket pa sorteo di e cas aki
cu tin un balor di 222 mil florin. Esaki ta e di 58 cas cu Lions ta
rifa pa comunidad.