Page 7 - CMB

Dialuna, 21 Mei 2018 AWEMainta 11

Parlamentario di AVP Arthur Dowers ta bisa cu hendenan a sinti nan mes humiya

Otmar Oduber ta haci un show di saca potret cu hendenan ora di duna tereno

DEN e ultimo dianan a bin hopi critica dilanti
y un di nan t’e poppenkast cu Otmar Oduber
a organisa. El a yama hopi hende cu a haya un
tereno prepara pa Benny Sevinger.
Parlamentario di fraccion di AVP, Arthur Dowers,
a indica cu Benny Sevinger a laga diferente
tereno midi cu por a duna na diferente grupo di
comunidad, pero Otmar Oduber a arma un show
pa crea e impresion cu e ta duna e terenonan aki
a humiya hende.

Tin hende cu a acerca Parlamentario Dowers y
a bisa na su persona cu nan a sinti nan mes
literalmente humiya. Esaki ta hendenan cu no
necesariamente ta votador di partido politico
cu ta den Gobierno of di partido AVP, pero ta
hendenan cu ta bisa cu nan ta sinti cu nan tin e
derecho di vota pa ken cu nan kier.
Tambe nan ta sinti cu nan tin e derecho di pidi
pa un pida tereno y nan ta sinti nan mes humiya
cu mester bay cerca un Minister y saca un potret
cun’e y haci un show pa rasonnan politico.

Tambe tin persona cu a expresa di tin mas di 10
aña cu un peticion di permiso pidi, tin un cu a
bisa di tin mas di 15 aña cu el a pidi permiso pa
un tereno y a haya esaki. E persona aki a indica
cu e ta haya cu esaki ta algo inaceptabel di un
democracia, unda ta haci e show aki.
Aworaki ta papia di situacion dificil y awor bo ta
haya bo tin cu bay huur un lugar, gasta placa cu
bo por uza p’e pueblo aki pa por haci un show
barata politico.

Parlamentario Dowers ta spera cu Gobierno aki
ta bay cuminsa recapacita, cuminsa bay traha na
bienestar di pueblo y stop cu e forma baho cu
nan ta hiba politica n’e momentonan aki. Hasta
votadonan di e mesun coalicion aki, e cos aki a
cay den mal tera.
Hende a acerca e Parlamentario y ta bon pa
denuncia e cos aki. Ta parce cu e hendenan aki
ta burachi di poder.
E hecho cu nan a logra sera cabes cu otro y
ta sinta eynan, ta pone cu nan ta haci cosnan
incomprendibel. Na final di dia fraccion di AVP
ta keda vigila nan y lo keda sigui denuncia e
cosnan aki.

Den Noticia

Noticia directo y confiabel.
Presenta tur media di 12'or pa 1'or

Cu Victor "Toko" Winklaar

y Alexa Werleman

na G-FM Galactica 99.9