Page 43 - min,jus july 9 2015

Situacion grave di comunicacion entre director y personal di
KIA ta causante principal di problemanan

Publication: Thursday, 9 July 2015. Categoria: General

Diahuebs ta dia pa decisionnan grandi na KIA

ORANJESTAD (AAN): Aunke rumornan
tabata fuerte na momento di publicacion di e articulo aki cu diaranson atardi Director di KIA
Trudy Hassell lo a entrega su retiro, no a logra ricibi confirmacion mesora di e rumor despues di
numeroso yamada tanto na Directora Trudy Hassell como na Minister Arthur Dowers. A purba
for di oranan di atardi pa anochi pa haya contacto cu nan, pero no a logra. Anochi finalmente
minister a contesta un di e numeroso yamadanan y a confirma cu e directora lo a entrega su
funcion como directora.

Mientrastanto Diaranson mainta den un entrevista Minister Dowers a laga sa cu tin problemanan
causa pa falta di bon comunicacion entre e director y e personal di KIA.

Na momento cu a scoge y apunta un director nobo pa KIA tabatin dos aspecto importante pa e
director traha riba dje, esta e situacion di e presonan y e situacion di e personal. Pa loke ta e
relacion cu e personal no tabatin avansenan positivo di acuerdo cu e deseo di ministerio di
husticia y Minister Arthur Dowers den e ultimo lunanan mas bien a ricibi hopi keho di parti di e
personal cu a yega na su oficina sea directamente of via di e sindicatonan envolvi.
Tabatin un welga y diferente menasa pa “walk out” y consecuentemente, practicamente tur siman
ta tumando luga reunionnan entre e sindicatonan y e mandatario, asina haciendo tur intento pa no
bin mas welga, pero mas bien pa purba di resolve e situacion di comunicacion entre e personal y
e director.

Despues di un welga na KIA pasobra tin malcontento entre e personal y director di KIA, esta
Trudy Hassell, Minister Dowers a pidi un comision di personanan imparcial pa evalua e
situacion y e kehonan, y entrega na dje un conseho con pa atende cu e situacion. Dowers a
confirma cu el a ricibi e conseho aki a drenta y pa diaranson atardi lo tabatin combersacionnan
pendiente relaciona cu e resultadonan di e sondeo.