Page 15 - Min.Jus 12jan'15

Minister Dowers ta lamenta cu hopi grupo ta promove
bebemento di alcohol

Sunday, 11 January 2015 20:49
Comparti

Den un entrevista diadomingo, Minister Dowers a subraya cu loke tur hende tin como meta ta pa tur
hende goza di Carnaval, pa ningun hende molestia otro hende, ni tampoco pa nan bebe dimas y haci cos
for di sla.
El a observa cu diferente grupo lamentablemente ta promove bebemento, tin open bar y muchanan jong
tambe ta probecha di bebe y bebe dimas. Ta studiando e posibilidadnan pa no solamente boet esunnan
cu ta den e gruponan y ta comporta nan mes malo, pero tambe pa por otorga multanan considerabel na e
gruponanan mes cu ta stimula bebemento for di sla. Pues, ora haya hende ta fiesta bao di influencia pisa,
lo por formula un multa pa e organisacion cu nan ta pertenece na dje, el a expresa, asina nan tambe ta
sinti e consecuencia di nan maneho. Minister Dowers ta lamenta profundamente con banda di 2’or di
madruga tabatin hende hoben deteni cu tabata completamente burachi, ful ful for di tino. El a remarca cu
nan por ni contesta si puntra nan ta kico nan a goza y kico nan ta corda di loke nan a goza. Dowers a
splica cu loke el a wak ta hende cu a paga nan placa y na final di dia a pasa berguensa, tabata tur na saca,
tur sushi y polis mester a lastra nan pone nan den cel pa nan drumi pa mainta un hende bin busca nan
paradero. El a bisa cu por lo menos e personanan cu el a wak na warda a wordo haya pa polis, pero
mester pensa cu ta si otro hende a haya nan nan por a bira victima di cosnan menos bon, entre otro
perdida di nan celular y cartera. “Mi a mira varios mucha jong, mucha muhe. Bo ta puntra bo mes toch,
ja, con por ta cu nos como comunidad, nos como mayornan no por bay asina leu na educa, forma nos
yiunan cu nan ta comparta nan mes na un forma corecto?” Dowers a bisa. El a añadi, “Nos no por educa
yiu di tur hende, pero si nos tin cu mantene ley y bo ta mira cu cada bez nos ta mantene ley mas estricto.”
Esaki tin como consecuencia cu tin hopi hende ta cay cera of ta haya nan mes ta paga boetnan
considerabel. Un otro cos cu ta analisando actualmente ta e posibilidad pa pone den detencion
preventivo e personanan cu ta causa problema manera buracheria y bringamento tur aña. Esaki lo por
encera cu nan mester ta na warda di polis durante di e paradanan y despues por bay nan cas. Minister
Dowers a felicita Cuerpo Policial y e gruponan cu a participa na Fakkel cu un parada cu a cuminsa y caba
na ora y tabata bon organisa. El a remarca si cu den e dianan nos dilanti mester adresa e topico di
siguridad den e gruponan mes y e responsabilidad di SMAC pa cu guiamento di e parada. Minister
Dowers a bisa cu tabatin mucho poco security den e gruponan mes pa percura rond di e grupo no tin
oportunidad pa hendenan di otro grupo drenta, pasobra por a nota cu hendenan cu a bay baila den
gruponan cu no ta di nan a causa poco consternacion. E minister a bisa cu tambe Cuerpo Policial mester
papia cu SMAC tocante e coordinacion di parada, pasobra nan a tuma un parti grandi di coordinacion di
e Fakkeloptocht, pero cu esaki no ta nan tarea y mester combersa habri tocante esaki pa cu e resto di e
temporada di Carnaval. Finalmente, Dowers a splica cu tabatin seis sub-fiscal trahando den coordinacion
cu e fiscal cu piket, kende nan tabata yama pa consulta den casonan mas complica pa cu boetnan. Tambe,
el a splica cu a uza e Warda di Playa cu ta cera temporalmente pa motibo di e mal condicion fisico di e
edificio, pero pa e temporada aki a prepara e prome piso y e celnan pa por haci uzo di nan.

Comentarionan (3)