Page 46 - KPA JUNE 10

Hoben a pone su bida na peliger pa Rescata un Rottweiler
for di Dam di Rooi Afo

Publication: Wednesday, 10 June 2015. Categoria: Policial

ORANJESTAD (AAN): Pasando den auto na altura di Dam di Rooi Afo, e dama hoben a mira
claramente con un cacho color preto, ta mal pega den lodo, buscando tur forma di sali.
Dam di Rooi Afo e dianan aki ta seco, ta djis un plas di awa so tin ainda, pero esaki ta full di
lodo, y facilmente bo ta pega den dje.
E dama hoben a yega su cas y hunto cu su propio mascotanan, na pia, nan a cana bay na e Dam
pa asina mira kico ta pasando.
Ora di yega na e Dam, el a mira cu e cacho ta un Rottweiler cu un banchi rond di su garganta, y
parce di ta un animal di raza bon manteni y cu kizas semper a keda den cura di cas cera.
Kizas e Rottweiler e biaha aki a huy di cas, y a dicidi bay hunga na e Dam. Sinembargo e lodo
aki ta ponebo pega facilmente y ta dificil pa sali di dje.
Na comienzo, e Rottweiler tabata pega na un banda, pues cu full su curpa hinca den dje.
Ora cu e dama hoben a yega eynan, su propio mascotanan kizas a spanta e Rottweiler, y el a trek
y cuminza move na e otro banda, sinembargo aki tambe el a bolbe pega den lodo.
Asina e dama hoben a yega cerca di dje, y a rek y a purba ranca y saca e cacho di e lodo.
E tabata asina profundo pega, cu ta solamente un pata por a mira. E otro patanan tabata
profundamente den lodo.
Ora e hoben a sinti cu el a cuminza sink den e lodo, el a core sali, y a pasa man pa un palet cu
tabatin eynan, pa asina e usa esaki como un plataforma pa e no sink den lodo.
Bon mes cu un otro ciudadano cu a mira e dama hoben ta rek e palet, a core bin yega pa check
con e por yuda. El a cuminza pone palo tambe pa evita mas pegamento den lodo.