Page 9 - AM210715

AWEMainta.com DIAHUEBS 15 JULI 2021| 9

Paki cu ta wordo manda pa exterior

mester yega Post Aruba habri

DEN cuadro di exigencia y desaroyonan
internacional den servicionan postal, Post Aruba
N.V. kier informa tur cliente cu ta haci uzo di
nan servicio di “Post/Petit Pakket”, lo siguiente.
Entrante 19 di juli 2021 tur paki pa exterior,
y cu ta contene mercancia, mester ta habri ora
di trece esakinan na nos postkantoornan. E
exigencia aki ta valido pa tur compania cu ta
brinda servicio di envio pa exterior.

Un di e exigencianan internacional ta cu
clientenan mester duna informacion completo y
corecto adelanta di kico nan lo ta mandando pa
otro pais. Esaki ta pa motibo di seguridad di e
pais destinatario, e aerolinea cu ta transporta e
pakinan y pa Aduana.

Pa Post Aruba por cumpli cu e exigencia
menciona, e empleado di Post Aruba mester por
verifica si e contenido di e paki ta cuadra cu loke
a wordo yena riba e formulario. Alabes pa evita
cu articulo peligroso of prohibi por wordo manda.

Si acaso e cliente no a yena un informacion
corecto of completo riba e formulario, e
empleado lo guia e cliente pa completa of coregi
esaki. Consecuentemente e cliente no mester
wordo yama pa bin bek nos oficina pa coregi
e informacion of pa saca mercancia di e paki,
acaso resulta cu esaki ta un articulo peligroso of
prohibi.
Tur informacion provee lo wordo procesa den

un programa computarisa di e sistema
postal internacional (di Union Postal
Universal) y ta wordo manda p’e
pais destinatario. Si no cumpli cu e
rekisitonan menciona, e pais destinatario
lo tarda pa procesa e paki y/of lo debolbe
e paki na Aruba/cliente.

E cambio den e proceso menciona ta
necesario pa por garantisa cu pakinan di
nos clientenan ta yega nan destinacion
y ta wordo procesa sin tardansa. Post
Aruba lo asisti su clientenan p’e proceso
di manda paki bay mas liher.

Adicionalmente Post Aruba lo lansa un
link di website caminda clientenan lo por
yena tur datonan desde nan computer na
cas, nan celular of cualkier otro aparato
prome cu yega na un balie di Post Aruba.
Keda pendiente p’e anuncio di e link
menciona