Page 78 - KPA JULY 24 2015

A bolbe haya bala cayente, cigaria y articulo falsifica

Publication: Friday, 24 July 2015. Categoria: Policial
Douane na Barcadera cu “Accion Maribomba”

ORANJESTAD (AAN): E accion di Douane ta sigui na tur entrada y salida legal di nos isla.
Nan ta poniendo man riba droga, contrabando y tambe municion. Esey ta resultado atrobe di un
accion na Barcadera. “Accion Maribomba” ta loke a tuma lugar e siman aki y cu a duna su fruto
tambe. Aki a subi barconan Venezolano entre otro cu ta bin cu carga for di pazuid. A confisca
alcohol cu tabata di mas y tambe atrobe mas cigaria.

E fenomeno di benta di cigaria di Venezuela sin paga impuesto a lanta cabez na Aruba. Pesey
mes te hasta si Douane descubri e cigarianan aki den negoshi ta confisca nan. Un hende por
drenta cu un carton pero pa uso propio solamente.

E Accion Maribomba ta Douane Barcadera y Douane Recherche a haci esaki. Den e caso di
proyectilnan a haya esaki den poder di un miembro di tripulacion. Asina mes a purba tira bala
cayente den lama y esaki tambe a keda confisca. Ta sospecha cu e arma tambe a bin pero no por
a logra haya esaki.

Un total di 7 carton di cigaria a keda confisca y dos boter di rum. Aki un multa di 900 florin a
wordo duna. A haya seis bala cayente y aki e multa tabata 300 florin. Tambe e accion tabata
dirigi riba cosnan di marca pero falso.

Marcanan manera Luis Vuitton, Michael Kors y Gucci. Entre e tres marcanan aki a confisca
72 tas dos en total. Tambe a confisca otro diez diferente tas di man di e mesun marcanan aki.
Fiscal ainda no a dicidi riba e multa pa esaki na Ministerio Publico.

Mester felicita cuerpo di Douane cu e trabou intensivo cu nan ta haciendo den diferente area e
ultimo simannan y por mira cu e resultadonan ta hopi positivo. Cu un team asina motiva y uni bo
lo yega sigur hopi leu cu e combatimento di cosnan contra ley.

http://www.diario.aw/2015/07/a-bolbe-haya-bala-cayente-cigaria-y-articulo-falsifica/