Page 16 - Min.Social 13 April'15

E proyecto Poder di Hubentud ta cla pa anuncia su promer nominadonan fin di e luna aki. E proyecto aki
ta un iniciativa di Minister Paul Croes di Asuntonan Social y Hubentud y bao di ehecucion di Asosacion
di Trabao pa Hubentud di Aruba (ATHA) cu ta hañando bon acogida den comunidad.

"Aki comunidad mes ta presenta y ta apoya nos hobenan cu den un of otro forma ta destaca. E ta un
proyecto cu ta pone e lus positivo riba nos hobenan", Minister Paul Croes encarga cu e maneho integral
di hubentud a mustra. E proyecto aki ta pa yuda e hobenan, cu tin tur potencial pa bira lidernan y cu por
guia otro hobenan den nos comunidad.

Ricibiendo un reconocimento asina por yuda e hobenan desaroya su mes mihor mirando cu nan lo ricibi
e guianan necesario for di profesionalnan y tambe un mentor cu lo yude den su desaroyo personal. Un
proyecto cu tin su beneficio pa e hoben pero tambe su famia cu lo ta esnan cu lo bay apoye tambe durante
henter e trajectoria. Hobenan cu ta apoya otro personanan den comunidad y cu ta aporta na e progreso
di un persona ta esnan cu ta wordo proponi pa haña e reconocimento Poder di Hubentud. "Nos hobenan
hopi bes ta wordo treci padilanti den lus negativo y a bira ora pa henter nos comunidad cuminsa hasi e
cambio den esaki tambe. Ban pone e luz positivo awor den e hobenan cu ta hasi trabaonan positivo pa
nan mes of pa otro persona den nos comunidad. Nos kier cu e proyecto aki Poder di Hubentud motiva
nos hobenan cu ta hasiendo cosnan positivo y pa nan wordo reconoci", Minister Paul Croes a mustra.
Director di ATHA sr. Ricky Hoek a keda encarga hunto cu un team dinamico pa ehecuta e proyecto aki y
ta trahando duro pa asina esaki keda realisa optimalmente. Comunidad completo por propone hobenan
cu ta destaca y ta yuda otronan. Trabounan boluntario, trabounan comunitario, hobenan den posicion di
liderazco, tur por wordo inclui pa recibi e Premio “ Poder Hoben”. E proyecto aki lo sigi te cu 12 di
Augustus unda varios hobenan cu ta destaca ta haña e oportunidad pa sigi e diferente curso y guianan
personal cu ta wordo ofreci na nan y na final den un gran celebracion di hoben pa hoben gana e
reconocimento importante aki. Educadornan, coaches, lidernan di organisacion, famia boso ta esnan cu
por inscribi e hoben potencial aki.

http://www.24ora.com/politica-mainmenu-18/94004-minister-paul-croes-comunidad-apoyando-
proyecto-poder-di-hubentud