Page 54 - flip min.on

Robert Nieuw, Presidente di Stichting Epilepsie Aruba hunto cu Iris Boekhoudt, cabesante di
Scol Preparatorio Washington a splica e chikitinnan cu ser diferente door cu bo tin un
enfermedad of un funcion celebral diferente no ta afecta nada di bo comunicacion y di duna
amistad y cuida otro.
“Mi ta hopi emociona di mira chikitinnan caba ta brasa e dia aki y comprende e esencia di
sostene otro alumnonan ora algo no ta bay bon. E union cu ta simbolisa amistad ta wordo sinti
akinan”, asina Minister Michelle Hooyboer–Winklaar a splica mientras e tabata parti blaasnan
di color biña pa hunto cu e muchanan laga nan bay den shelo, simbolisando e dia di
conscientisacion di Epilepsia.
“Loke nos ta presencia awe na Scol Preparatorio Washington ta un dedicacion special den un
rato educacional cu lo keda semper den nan mente, cu nan como persona ta importante y nan
por yuda otro alumnonan. Responsabilidad y compasion”, tabata palabranan di Minister
Michelle Hooyboer–Winklaar.
Miyones di hende rond mundo ta sufri di epilepsia. Por bisa cu 1 riba cada 100 hende por haya
un ataca di epilepsia den nan bida y p’esey ta hopi importante pa nos muchanan tambe ta bon
consciente di e enfermedad aki.
Na final e muchanan a declama un bunita poesia. “Awe nos ta bisti na color biña y aunke nos
por ta diferente, nos tur ta mes balente y corda cu den boso mente cu SEA semper ta diferente”.
Pa finalisa Minister Michelle Hooyboer–Winklaar a parti un delicioso cupcake color biña pa
yama e muchanan danki pa forma parti den un forma asina special.

http://www.24ora.com/politica-mainmenu-18/93444-aunke-nos-por-ta-diferente-nos-tur-ta-mesun-
balente