Page 32 - MIN.TTC MAY 11,2015

Aruba ta un di e poco paisnan na mundo cu tin un dependencia asina grandi
riba Turismo.
Publication: Monday, 11 May 2015. Categoria: General
Parlamentario Jennifer Arends-Reyes

ORANJESTAD(AAN): Miembro di fraccion di AVP den Parlamento, Jennifer Arends-Reyes,
durante di tratamento di presupuesto 2015 di turismo, a mustra riba e desaroyonan positivo cu
turismo ta pasando aden, cual ta wordo sosteni pa diferente instancia importante, no solamente
aki na Aruba pero tambe di exterior.
“Turismo a transforma su mes den e pilar economico number un di nos pais, y maneho cu
Gobierno a bin ta hibando ultimo cinco aña y mei, ta di reconoce pa su desaroyo impresionante y
cu ta sigui mustra progreso den casi tur aspecto.
Ta di lamenta scucha un colega di oposicion trata di bagatelisa e desaroyo aki, mientras cu
instancianan a bin ta mustrando for di algun aña caba riba e importancia di turismo di Aruba.
Esaki a wordo reconoci tur caminda entre otro pa IMF, Standard & Poors, Banco Central di
Aruba, Camara di Comercio di Aruba, Gobierno Hulandes y hasta for di aña pasa pa e tan discuti
CFT. Aruba ta un di e poco paisnan na mundo cu tin un dependencia asina grandi ariba Turismo
y nos ta un isla bendiciona cu nos tin un grupo grandi cu ta sostene y monitor e desaroyo aki dia
aden y dia afor riba diferente nivel.
Tur instancia ta reconoce e importancia cu turismo di Aruba a hunga pa yuda nos isla supera e
crisis economico mundial, y gran parti di esaki a sosode c’un maneho efectivo y dirigi di
Gobierno di Aruba den ultimo cinco aña y mei.
Ya caba na inicio di aña Aruba Tourism Authority a emiti su plan di maneho pa 2015 y a duna
un perspectiva tambe pa 2016, caminda por a mira cu e enfoke ta sigui pa percura pa ricibi
turistanan cu lo gasta hopi aki na Aruba y por a tuma nota di cifranan cu a wordo produci, riba e
aumento di entrada den economia di nos isla.