Page 28 - min vos

Rainbow for Girls a tene un exitoso bake sale riba dia di
Himno y Bandera

Friday, 20 March 2015 15:00
Comparti

Manera ta custumber pa algun aña caba, e organisacion di Rainbow for Girls a tene un recaudacion di
fondo den forma di un bake sale durante celebracion di dia 18 di maart na Fort Zoutman.

Durante e mainta festivo aki, e miembro nan a bende diferente cos dushi manera kuki, bolo, brownies,
drigidek, chupabebe, awa di lamunchi, pastechi, kroket y hopi mas. E meta di e bake sale aki ta pa
recauda fondo pa realisa diferente proyecto di servicio cu Rainbow for Girls tin plania. Rainbow for Girls,
cu a wordo funda na aña 2002 na Aruba, ta un organisacion internacional pa mucha muhenan entre 11 y
21 aña cu ta yuda forma hobennan pa bira lider nan den nos comunidad atrabes di trabou comunitario.
Rainbow for Girls ta siña hobennan e importancia di haci obra nan di servicio y caridad door di participa
den diferente proyectonan boluntario durante henter aña.

Den e siman y lunanan venidero, e miembro nan di Rainbow for Girls lo participa den diferente proyecto
manera entre otro Aruba Doet caminda nan lo bai verf na Colegio Conrado Coronel. Tambe nan lo yuda
cu Fiesta Rotaria, nan lo organisa un beach clean-up, nan lo colecta placa pa Wilhelmina Kankerfonds y
nan lo bishita cas di nos grandi nan. Tur esaki ta djis algun ehempel di e trabou nan cu e organisacion ta
haci.
Riba diasabra dia 28 di maart venidero lo tin un atardi infromativo pa tur hoben y mayor cu ta desea di
haya sa mas di Rainbow for Girls. Pa mas informacion tocante e organisacion por yama libremente na
telefon 593 4192.