Page 15 - HOH FEB 27 2015

No por tin feitenonderzoek riba sala di operacion pasobra
ainda e proceso ta andando

Publication: Friday, 27 February 2015. Categoria: General
Minister Schwengle:

ORANJESTAD(AAN): Minister di Salubridad Publico dr. Alex Schwengle tabata den
Parlamento henter dia diahuebs unda cu a cuminsa trata e tema di proyecto hospital, un peticion
haci door di fraccion di MEP aña pasa februari.
Den combersacion cu Minister Schwengle, el a bisa cu su persona no tin nada di haber cu e
tardansa pa e reunion aki tuma luga.
Di otro banda, e motibo di e peticion haci aña pasa ta diferente di e tema cu awor oposicion a
trece den discusion, esta e salanan di operacion cu no a worde inclui den e diseñonan nobo.
E peticion inicial tin di haber cu e hecho cu e Raad van Toezicht a baha completamente y
miembro di directiva cu tin di haber cu cuido a bay cas, ya cu su contracto a finalisa. Tabatin un
problema grandi den maneho di hospital. Awor e parti di preocupacion tin di haber cu hospital
mes.
E mandatario a bisa cu el a contesta e preguntanan varios biaha caba di prensa y cu no tin ningun
maldad tras di e hecho cu e sala di operacion no a worde inclui. A resulta cu e calculacion cu a
haci cu e sala di operacion por wanta un dies aña mas, manera a worde documenta na 2010 y
2012 no tabatin mester di renobacion sino solamente haci algun cambio chikito.
“Lamentablemente tempo a mustra algo diferente, cu na final di 2013 caba tabatin
preocupacionnan di parti di hospital , pero no documenta, cu e salanan di operacion lo no tabata
adecuado. Door cu no tabatin un directiva completo no por a haci un investigacion profundo mas
lihe y consultando Inspectie di Hulanda cu tuma luga na juli 2014.” E resultado a mustra cu sala
di operacion no ta adecuado y mester a cambie urgentemente y a informa Medirisk, e compania
di seguro na Hulanda, di esaki.