Page 20 - HOH FEB 27 2015

AZV ta spera riba un solucion di sala di operacion pa cumpli
cu derecho di aseguradonan

ORANJESTAD (AAN): Drs. Anko Ringeling tambe tabata presente den e reunion publico di
Parlamento cu a worde yama pa atende cu e proyecto di hospital. Segun Ringeling a duna di
conoce den un combersacion cu nos, AZV tin un responsabilidad pa sigura e derecho cu
aseguradonan tin riba cuido medico, esta cu nan por haci uzo di e derecho ey y cu e ta suficiente
y di calidad.

Pesey nan a bin ta siguiendo e desaroyonan tumando luga relaciona cu renobacion y ampliacion
di dr. Horacio Oduber Hospital y e hecho cu e salanan di operacion no ta cuadra cu cierto
criterionan di calidad y mester worde renoba.

“Nos no ta e prome yama pa duna un opinion riba e forma mas responsabel pa yega na esey.
AZV continuamente ta den deliberacion cu directiva y gerencia di hospital y e Minister. Pero nos
no ta esnan pa bisa con esaki mester tuma luga. E ta un asunto di hospital den deliberacion cu
Gobierno y Minister.” Pero di tur manera, Ringeling a trece dilanti cu AZV ta urgi pa e proceso
di tuma decision worde haci na tempo pa bini un claridad, ya cu “si e claridad no bini nos por
haya problema. Por ehempel, si dado momento e salanan di operacion no por worde uza, e
derecho di aseguradonan ta keda existi. Nos por haya un situacion cu operacionnan cu
normalmente por worde haci na Aruba, nos mester manda e pashentnan afo, cu tur su
consecuencianan financiero y e presion cu e ta pone riba e pashentnan y nan famia.

Nos ta spera cu e no yega asina leu,” Ringeling a expresa. E ehecutivo a duna di conoce cu
mirando con e deliberacionnan ta bayendo entre Gobierno y Hospital, cu pronto lo bini claridad y
un plan concreto pa realisa e renobacion di e salanan di operacion. E fondo pa e renobacion
tampoco ta algo cu AZV tin di haber cune. E reunion riba e proyecto di renobacion y ampliacion
di dr. Horacio Oduber Hospital a cuminsa ayera mainta. E ta un reunion pidi door di partido
MEP na luna di februari, 2014 y aunke e tempo ey e salanan di operacion no tabata e tema di
discusion, el a bini dilanti den e reunion di ayera cu a sigui te den oranan laat di anochi.