Page 7 - HCCA APRIL 15

Minister Schwengle: Sint Maarten ta preparando pa Health
Care Conference Aruba

Tuesday, 14 April 2015 21:40
Comparti

Minister dr. Alex Schwengle ta bishitando islanan den Caribe Hulandes e siman aki, den cuadro di
preparacion y den anticipacion pa e Health Care Conference Aruba cu ta tuma luga e prome siman di
Juni proximo.
Durante un bishita na Medical Center Sint Maarten, a reuni cu gruponan di interes pa cu e conferencia
cu ta bini como iniciativa di e Parlamentonan di Hulanda y di paisnan den Caribe Hulandes. E diferente
stakeholdernan den e ramo medico ya ta preparando pa e conferencia pa cual nan tin expectativanan
halto pa yega na resultadonan positivo.
Glen Carti, Director interino di SZV cu ta e maneha e seguro social y di salud, a splica cu diferente
reunion ta tumando luga localmente. Durante di e reunionnan aki, entre otro cu Hospital, SZV y
Gobierno, ta trahando pa delinea e topiconan cu ta importante pa Sint Maarten, identifica e retonan y
posibel solucionnan, areanan cu pa medio di colaboracion por yega na solucionnan y tur detayenan
relevante pa participacion di e isla.
El a comenta cu nan ta poniendo tur ego un banda y lo presenta un bos y e ta spera cu esaki por pasa
durante di HCCA tambe, pues cu tur partner den Reino Hulandes por laga tur ego cay pa establece
relacionnan y solucionnan hunto cu ta na bienestar di tur ciudadano den Reino.
E reunion preliminar cu Minister Schwengle, unda el a elabora riba e programa pa e conferencia, a bay
hopi bon. E participantenan ta miembronan di un task force cu a wordo forma riba peticion di Minister
di Salud di Sint Maarten, Rita Bourne-Gumbs pa prepara pa HCCA y ta inclui representantenan di
Directie Volksgezondheid, Inspector General di Salud, SZV y directiva di Medical Center Sint Maarten.
E comision di Sint Maarten ta convenci cu mester por apoya otro como paisnan den Reino y yega na
conclusionnan y acuerdonan pa traha hunto. E taskforce ta sali di e punto di bista cu mester discuti kico
Sint Maarten mester, ki tipo di cuido e isla mester y con ta bay logra esaki. Pa e isla aki ta importante pa
defini “calidad di cuido”, pero tambe pa pone den balansa e gastonan y balor di e cuido.
Glen Carti a subraya cu e conferencia ta importante pa Sint Maarten y cu nan a tuma e oportunidad cu
brasa habri, pasobra e ta un oportunidad unda cu hopi “powerful minds” lo bin hunto pa discuti tocante
asuntonan sumamente importante pa cu salubridad. Un bon cuido di salud ta un di e pilarnan di un bon
pais y den union tin forsa, Carti a expresa.
El a conclui bisando cu aunke Antias a cay for di otro, e hendenan a keda conecta cu otro socialmente y
den e union tin poder. E ta pensa pa cu SZV den e direccion di colaboracion cu Aruba su SVB y asina niun
di dos tin mester di re inventa e wiel, pero por siña di otro. Na final di dia e meta ta pa traha hunto riba
problemanan comun pa asina alivia e problemanan aki.