Page 86 - AHATA

Locual tin entendi ta cu e residentenan si por drenta Aruba bek. E porta pa nan no por
wordo cera pasobra nan ta biba akinan, asina Prome Minister Evelyn Wever – Croes a
indica.

Sinembargo, na otro banda tin e situacion actual di e aerolineanan mes, cual ta
hayando avalancha di yamadanan of bishita di clientenan preocupa.

DIARIO a tuma contacto cu representantenan di AVIANCA na Aruba ya cu esaki ta un

aerolinea hopi uza pa local y colombianonan residente.

E intencion ta pa haya sa con e aerolinea ta atendiendo cu e situacion ya cu desde e
weekend ultimo Colombia tambe a dicidi di cera su fronteranan y esaki a trece cune cu

e aerolinea a dicidi di reduci nan operacion den un 30 pa 40 porciento.

Te cu dialuna mainta, e vuelonan di Avianca tabata operando normal y e residentenan
por a bin Aruba bek sin ningun problema. Sinembargo, tin pasaheronan cu ta hayando

email for di e compania informando nan cu nan vuelo pa Aruba tin cambio pa motibo di
e reduccion di vuelonan.

E asunto aki a resulta den un incertidumbre grandi cerca esnan cu tin cu bin bek como

cerca esnan cu mester a bula den e dianan aki pa bay bek nan pais.

Tin colombianonan cu a bin Aruba pa bishita nan famia of pa negoshi. A haya sa di un
pareha peruano turista cu a bula cu Avianca y cu pa colmo e señora ta na estado y nan

ta preocupa cu nan vuelo pa bay Peru bek.

Asina mes tin mas hende den un condicion di stress na hopi otro pais y cu mester
regresa Aruba via Bogota.

Dialuna mes parce cu AVIANCA su sistema a cay posiblemente pa haci cambionan
interno cu mester wordo haci pa cu e itinerarionan. Esaki a nifica cu no por a haci
ningun cambio, ni cumpra tickets.

Te cu merdia, segun DIARIO por a conforma, tur cos tabata mustra cu e pasaheronan
cu tabata desea di haci cambio den nan vuelo lo por a haci esaki sin costo adicional.