Page 65 - Minister Alex Schwengle April 2,2015

Minister Alex Schwengle a reuni cu expertonan di Harvard
Business School

 Apr 2nd, 2015
 Local

Minister dr. Alex Schwengle a haci un bishita di trabao na Harvard Business School unda el a
reuni cu Professor Robert Kaplan, kende ta Marvin Bower Professor of Leadership
Development, Emeritus, y Derek Haas kende tin e funcion di Senior Project Leader Value
Management in Health Care. Durante di e encuentronan Minister Schwengle a ricibi
confirmacion di participacion di Harvard na HCCA, Health Care Conference Aruba cu ta
tumando luga dianan 1 pa 4 di juni, 2015.

E mandatario tin e placer di anuncia cu ademas, di e participacion di parti di e institucion
prestigioso Mericano, Derek Haas lo ta un di e oradornan na e conferencia.
E punto di enfoke cu HCCA ta pa trece expertonan den cuido y medicina di tur e paisnan partner
den Reino Hulandes hunto, y cu participacion di expertonan y oradornan di diferente otro pais,
pa discuti e oportunidadnan cu nan cada uno por ofrece otro na bienestar di pashentnan den tur
parti di Reino Hulandes. E meta ta pa yega na posibel solucionnan pa retonan existente cu – den
caso di e seis islanan – principalmente ta existi pa via di e grandura di e islanan (paisnan di
economianan chikito) y e mercado.
Professor Kaplan y sr. Haas tin amplio experiencia y experticio den area di cuido di servicio di
calidad y control di calidad den cuido medico y salud. E expertonan a haya atencion
internacional cu publicacion di e articulonan “How not to cut health care costs” (Con pa no corta
den gastonan di cuido) y “Delivering higher value care means spending more time with patients”
(Duna cuido di balor mas halto kiermen duna mas tempo na e pashent).
E topiconan aki a capta atencion di gobierno, institucion, profesionalnan den e area di salud y
esunnan cu ta para prome den liña pa duna servicio. Professor Kaplan y Derek Haas a presenta
na Minister Schwengle nan investigacionnan y trabao haci den e area di cuido y salud. Den
esakinan nan ta evalua y midi calidad y costo di cuido poniendo e pashent central den maneho di
cuido. Den cuadro di su expertisio Haas lo duna un tayer tambe den cual e lo comparti su
conocimento den manheo di costo di cuido.
Derek Haas tin un Bachelor y un Master Degree den Economics di Harvard y ta fundador di
Avant-garde Health, cual ta colabora cu proveedornan di cuido pa provee cuido cu un balor
halto. E tin amplio experiencia trahando cu instancianan riba nivel halto, cu un enfoke riba
maneho financiero di sistemanan di salubridad. El a traha cu e President’s Council of Economic
Advisors, cu ta un instancia consultativo di e presidente Mericano y e tabata un consehero pa cu
diferente asunto legislativo den e area di salubridad pa e Inspector General su oficina na
Massachusetts y a traha riba e presentación di un programa pa haci seguro medico mas rasonabel
pa negoshinan chikito.