Page 36 - MIN TTC Jan 26

Monday, 26 January 2015 15:19

Comparti

Despues di un fin di siman hopi intensivo, den cual nos a haya tempo pa reflexiona, nos tin un solo
conclusion: Colegio San Antonio ta sumamente orguyoso di nos Reina Keighley Loopstok.

Hopi comentario a wordo duna, hopi hende a opina pero nos como scol tawatin un solo preocupacion y
esaki tawata semper e bienestar di nos reina y nos pancho Endrick Panneflek.

E dos hobennan aki a mustra Aruba henter cu nan conoce loke ta honestidad, humildad y madurez pa por
a deal cu e situacion dificil cu a surgi. E hobennan riba escenario a mustra Aruba henter cu nos por sigui
confia den nos futuro generacion.

Nos a acepta e experiencia aki y ta purbando di haci algo bunita di dje. Nos ta aprecia cu e organisacion di
carnaval 61 a aclarea tur sucedido y cu nos tur por biba satisfecho cu e resultado final.

Aruba henter awor sa cu nos scol tin hobennan capacita. Aruba henter sa cu nos alumnonan ta orguyoso
di forma parti di nos scol. Aruba henter sa cu pa nos, Colegio San Antonio ta #thebestschoolever. No tin
lugar pa discucion. Nos scol a demostra cu por participa pa reina di carnaval cu un budget chikito y duna
un tremendo presentacion. Hopi alumno y ex-alumno a duna un man, a mix e show, a fia pluma y parti di
kostuum. Otronan a ofrece pa hinca e show den otro y prepara e coreografia. Alumnonan a cumpra
kaarchi masalmente pa apoya e prome reina di nos scol cu a subi escenario di eleccion di Reina Hubenil di
Aruba su carnaval y no tin otro palabra pa describi su presentacion cu ta SUBLIME!

Pa algun minuut nos a experencia un alegria enorme, pa algun minuut nos tawatin e corona. Y kere nos cu
nos a gosa di e momento ey. Pueblo di Aruba lo keda corda Keighley como un mucha muher bunita di pafo
como tambe di paden. Ela horta nos curason!

Dialuna Keighley y Endrick a wordo ricibi cu tur honor na scol. Ambos a subi riba un Jeep decora cu blaas
y core subi schoolplein bou di aplouso di henter school. Despues director di scol meneer Tromp a felicita y
gradici Keighley pa su tremendo trabou y a entregue un regalito. Na mes momento Keighley a ricibi un
album cu mensahe di alumnonan di scol cu kier a felicite y mustre nan apoyo.

Nos kier extende nos palabra di pabien na Ginoushka Tromp di Noord pa su bunita presentacion. Nos kier
felicita Jenissa Maduro di Popcorn cu su titulo y nos kier desee un bunita reinado. Na final di e storia e
unico conclusion cu nos por saca ta cu hubentud di Aruba a gana!