Page 12 - ATA

“E proyecto cu sr. Albertz kier a bin cun’e, ta uno grandi cu, incluyendo e cobertura di
ESPN, e ta riba e suma di 350 mil florin. E ta cay bao di otro grado di evaluacion. ATA
ta wak e cantidad di bishitantenan. No solamente e cantidad y e perfil cu e evento ta
atrae” director di ATA a subraya.

Esaki ta nifica cu si e ta un bishitante cu ta keda na hotel, si e ta di un mercado unda
cu Aruba tin inversion y e ta cuadra cu e manera con e ta posiciona a destinacion
Aruba. Tambe ATA ta wak e balor di promocion kico e ta nifica pa Aruba.

Entre otro, pa medio di un ESPN of plataforma multiple. ATA ta considera tambe e
calidad di e evento y e organizacion tras di dje, e profesionalismo, e confianza cu e ta
brinda nos, si enberdad e por organiza algo di calidad.

“Na final ATA ta evalua tambe si e ta cuadra den e calendario di evento cu ATA ta
presenta na bishitante of posibel bishitantenan” e dama a indica.

Sra. Tjin Asjoe- Croes a sigui splica cu e calendario di evento, cu ta entre otro,
disponible riba aruba.com ta permiti bishita durante e temporada caminda tin un
evento.

“E evento por ta musical, deportivo of cultural. Esaki ta un par di criteria cu ta evalua.
Un ves e evento tuma luga, despues, atrobe dependiendo di e grandura di e inversion,
tin puntonan multiple cu nan ta midi tambe pa asina dicidi si nan ta bay sigui cu un
inversion.

“Y esaki por inclui, atrobe dependiendo di e grandura di e evento, e por hasta inclui un
auditoria financiero, conduci door di un accountant-bureau independiente. Esaki ta sigur
algo cu ATA ta haci cu eventonan grandi y tambe nan tin un modelo cu nan a crea,

caminda cu cada obligacion den un contrato cu ATA ta cera cu esun cu nan ta duna e
aporte, di parti di e partido ey ta wordo midi conforme si nan a cumpli cun’e si of no”
director di ATA a expresa.

Na final ta yega na un score total cu ta un punto cu ta sirbi ATA pa duna informacion, si
e evento ta un “keeper” of e ta algo cu no lo continua cun’e.