Page 13 - HOH 16 SEPT 2015

Marilu Koolman, “junior beleidsmedewerker” y projectmanager EPD na hospital a bisa cu e
proyecto ta carga e nomber di IMPACT cual ta significa “Improving Patient Care Through
Technology”, esta mehoracion di cuido di pashent pa medio di tecnologia. E EPD ta un
instrumento mas pa drecha e procesonan den e trayectorio pa drecha cuido pa e pashentnan, el a
splica. Ta un proceso cu lo bay tuma luga en cooperacion di tur cu ta labora na Hospital.

Primeramente, Koolman a comenta, hospital a enfoca riba e parti administrativo, esta pa
digitalisa e datonan di e pashent na e puntonan cu tin di haci cu administracion, manera admision
y facturacion. E proceso aki a cuminsa desde 2009. Awo e momento a yega pa pone e resto di e
proyecto den implementacion, esta e parti di maneho di informacion medico di e pashent.

Ta registra tur pashent admiti na hospital of cu bay policlinica di specialista cu ta traha cu
hospital, den e programa hunto cu tur dato, incluyendo historia medico, e remedinan cu e ta
tuma, historia medico di su famia unda cu ta relevante p’e y e enfermedadnan y condicionnan cu
e ta biba cun’e, ta wordo registra den e software.

Asina hospital ta haci e comunicacion multidisplinario encuanto e pashent mas facil, Koolman a
remarca. Ora e pashent yega na un dokter, danki na e sistema aki e lo ta bon na altura di tur loke
pashent a pasa aden, ki remedinan e por tuma of no por tuma, ki remedinan e ta tumando y e por
wak e pashent su progreso y desaroyo. Esaki ta haci hopi mas facil pa e dokternan colabora
encuanto e cuido di e pashent.

E idea ta pa “Go- live” na Augustus 2016 cu e pashentnan cu ta interna na e momento ey y sigui
poco poco expande riba e dossiernan y e informacion di pashentnan. Esaki file di cada pashent lo
ser expande na momento cu e bin den contacto cu hospital y e policlinicanan di specialista.