Page 3 - AWEM 12-Feb-2015

AWEMainta Diahuebs, 12 Februari 2015 3

Pa di 3 aña consecutivo

Divi Aruba Beach
Tennis Tournament
nombra e evento di
aña 2014

CU un alegria e organisacion di Beach Tennis na Aruba a ricibi

e grato noticia cu pa di 3 aña consecutivo e evento organisa na
Aruba durante e luna di november ta wordo nombra e evento di
aña den tur e evento nan organisa pa ITF durante 2014 durante
e Oscar Beach Tennis cu ta wordo teni na Italia. E competencia
di mas grandi di Aruba t’e evento organisa na Cervia na Italia cu
a gana e titulo aki na 2010 y 2011, pero desde 2012 ta pertenece
na Aruba.

Un evento grandi pa cual no tin palabra pa splica kico esaki nifica
pa Aruba den e deporte aki. E dia despues di e evento tur hende
por nota comentarionan riba rednan social manera FB caminda e
hungadornan ya ta haci count down pa por ta bek e proximo aña.
Loke ta haci e evento na Aruba algo unico, no ta solamente e
premio cu no por wordo iguala na ningun otro pais of evento, sino
e fiesta cu tin banda di e torneo. Cada persona no unicamente
ta bin pa participa y bay cu premio, pero tambe ta haci uso di e
evento aki pa por ta den e fiesta di Beach Tennis di mas grandi
na mundo.

Remarcabel den 2014 tabata e participacion en grandi di diferente
pais cu a participa. Nos ta referi na un total di 23 diferente pais:
Venezuela, Chile, Russia, Puerto Rico, Brazil, Italia, Hulanda y
asina aki nos por sigi menciona. Y por menciona cu ta basta caba
a confirma nan participacion p’e aña aki. Otro punto remarcabel
ta cu mayoria e biaha aki a bin mas tempran y a tuma e tempo pa
conoce nos isla un tiki mas cu ta aporta hopi na nos tursimo.

Durante e Oscar Beach Tennis Award no ta unicamente ta saca
e evento di aña, sino tambe ta premia e hungadornan cu mas
a destaca durante 2014. Pa por menciona algun: Best Player
Men – Marco Garavini, kende no ta un desconoci na Aruba. E
premio aki tabata pertence na Calbucci p’e ultimo 3 añanan. Best
Player Women a bay pa Federica Bacchetta. Den e ramo aki si
por a note diferente ganadora den e ultimo aña nan. Na 2013 e
representante di Brazil Cortez a gana e titulo aki. Nos kier invita
un y tur pa pasa try out e deporte aki na Tropicana Beach Tennis
Club situa net banda di Tropicana Hotel. Pa mas informacion
tambe por bishita e website www.beachtennisaruba.com