Page 5 - CITGO

16 AWEMainta Dialuna, 21 Mei 2018

Fuels Marketing & Supply Aruba (FMSA) N.V.
A reconoce sr. Aiky Croes y sra. Elva Croes-Tromp

SR. MARIO Alcaldo Croes – mihor conoci
como Aiky Croes, no ta un persona desconoci
den e mundo di dealer di combustibel. Sr. Aiky
Croes a inicia su carera den Colony na aña
1960, como empleado di e gas stacion di su
tata sr. Francisco C. Croes y por ultimo como
dealer di e stacion di gasolin na Savaneta, awor
conoci como Citgo Savaneta.
Un carera di 58 aña cu seguramente ta di
admira.

Na mesun momento, FMSA a reconoce sra.
Elva Croes-Tromp, mihor conoci como sra. Elsa
Croes casa di Sr. Aiky Croes, pa su añanan di
servicio n’e stacion di gasolin di Savaneta. Sra.
Croes a traha 53 aña n’e dealership di famia
Croes, el a cuminsa su carera como empleada y
despues como accountant di e dealership.
Diabierna ultimo, FMSA a invita sr. y sra.
Croes pa un lunch dedica specialmente na nan
añanan di servicio cu e diferente companianan
di “Marketing & Supply”, cuminsando for di
Lago te cu awor cu e compania Fuels Marketing
& Supply Aruba N.V. - e compania principal cu
ta distribui gasolin riba nos isla cu ta resorta
bou Refineria di Aruba N.V. (RdA).

E atardi tabata den un ambiente sumamamente
ameno, invitadonan tabatin e oportunidad di
rebiba y comparti algun memoria y anectodonan
trahando pa y cu e dealership.
Na final di e lunch, sr. Alvin Koolman—CEO
& Managing Director di RdA, a duna un
discurso cortico p’asina mustra su aprecio y
duna danki na sr. y sra. Croes pa nan añanan di
servicio, sigui pa sres. Sergio Schwengle, Glenn
Geerman, Marlon Werleman, Rudy Croes y por
ultimo Aiky Croes.
“Mi ta pasa e dealership pa mi ruman Rudy,
esey no kiermen cu mi no lo ta para patras di
porta pa wak kico e ta haci” ta loke Aiky Croes
a bisa cu a pone tur presente hari.

Ta importante pa menciona cu e aña aki ta
cumpli 65 aña cu famia Croes tin e dealership,
un logro cu seguramente ta di admira y reconoce.
Rudy Croes a elabora riba e cambionan cu lo
bay bin na Citgo Savaneta den futuro cercano,
y ta ancioso pa inova unda esaki ta necesario pa
sigui padilanti cu e dealership di famia Croes.
Por ultimo, a termina e atardi deseando sr. y
sra. Croes tur clase di exito cu nan añanan di
“oro”, nan añanan di pensioen y pues tambe
exito na sr. Rudy Croes cu awor lo t’e dealer di
Citgo Savaneta.