Page 31 - MIN ARENDS

Cada orador tabatin palabranan di aprecio pa su inmenso calidadnan y
inteligencia incomparabel

ORANJESTAD- Den e sala di EPI completamente yen, den presencia di su casa,
su tres yiunan, su mayornan, su ruman mohe y demas famia, e candidato fuerte
di partido AVP Richard Arends a keda anuncia. No cabe duda cu Richard ta un
candidato cu calidadnan exepcional. Cada orador a elogia e inteligencia infinito di
Richard Arends y tur tabata falta superlativo pa expresa nan mes ora nan tabata
papia di su capacidadnan intelectual. Luciano Milliard a bisa cu Richard ta un
compas cu por confia riba dje y ta sirbi como guia pa Aruba.

Sra. Selima Maduro-Halabi a expresa su mes den forma hopi personal ya cu e
conoce Richard desde nan ta mucha. P’e Richard ta un tremendo tata di famia y
un bon casa y yiu. Minister Bermudez tambe tabatin palabranan di aprecio pa e
persona Richard Arends y a menciona varios reunion cu nan a atende hunto y
unda e inteligencia di Richard semper ta hunga un rol grandi. Na final di su
discurso el a priminti Richard dilanti e centenares di hende cu e ta vota p’e den e
siguiente eleccion. Minister de Meza ta otro cu a conta di e capacidadnan di
Richard y a recorda con apesar di su edad hoben el a sa di pone hendenan para
straight ora e tabata hiba negocacionnan cu entre otro grandinan di e mundo
empresarial. Richard a lidera e ekipo cu a haci e exitoso trabou di reapertura di e
refineria. Aki el a negocia cu ehecutivonan halto di CITGO.

Lider di partido Mike Eman a bisa cu e calidadnan di Richard ta legio y su
inteligencia incomparabel, pero esey so no ta haci un persona un bon politico.
Banda di esaki Richard tin su curazon na e bon lugar. Un curazon cu ta bati pa su
hendenan, pa e comunidad aki. El a finalisa su discurso bisando: Aruba ta yama
bo bonbini.

Na momento cu Richard Arends a subi stage pa papia e hendenan tabata
completamente entusiasma. El a gradici su casa y yiunan, su mayornan y su
ruman mohe y demas famia presente. El a splica pakico el a scoge pa subi lista
di partido AVP.

“E contesta ta simpel: un partido mester ta basa riba un ideologia y no riba
pragmatismo. Mi ta kere firmemente den e fundamentonan di e ideologia social-
cristian cu e partido ta basa riba dje. Mi ta kere den responsabilidad comparti
unda Gobierno ta mantene su mes na su tareanan propio.