Page 46 - ARUBA BANK

WILLEMSTAD - Tur momento Banco Central tabatin acceso na cuenta di Banco del
Orinoco, ta loke cu mr. Bloem a duna di conoce den sala di corte ayera. Banco del
Orinoco (BDO) a apela e decision di corte pa declara BDO bancarota. Segun BDO
debidamente nan tin fondo. E trahadonan di BDO tambe a uni den e proceso aki contra di
Banco Central, pasobra a cera e banco y te awe nan no a cobra.

Remarcabel den sala di corte tabata presencia di ex presidente di Banco Central, drs.
Emsley Tromp, cu tabata sinta banda di di e abogadonan di Banco del Orinoco.

Esaki tambe e abogado a trece dilanti indicando cu e banco tabata draai bon bon y tabata
paga tur trahado. A cera e banco sin cu e trahadonan a haya pago di salario for di luna di
september ultimo.

Pa e abogado ta straño con Banco Central no ta na altura di e bienesnan di BDO, pasobra
for di basta tempo Banco Central tabatin acceso na director na cuenta di BDO, cu tabata
cerca e kantoor Bloomberg.

Tur informacion financiero di BDO, Banco Central tabata haya y mira. Banco Central
tabata haya informacion di BDO mensualmente, semanal y e ultimo dianan hasta el a bira
diario.

“Sra. huez Banco Central kier convence bo, cu BDO no tin cen na e kantoor Vistra, y cu
Vistra no ta un “custodian”, pero ta Banco Central mes ta traha cu esaki e ultimo
simannan. Banco Central a haci investigacion riba BDO tur caminda na Panama y hasta
na Ernst & Young”, segun mr. Bloem.

E defensor a sigui bisa cu Banco Central ta acusa BDO di a falsifica documento, pero tur
loke cu ta para den e supuesto documento falsifica ta corecto si.

Ta for di luna di juli ultimo BDO a pidi Banco Central pa sinta papia, pero no tabatin
oido pa nan. BDO no a haya ningun reaccion di parti Banco Central. Pa luna di september
nan a haya carta di sorpresa, cu ta kita nan permit y seguidamente a bin Areglo di
Emergencia pa BDO. No a dura hopi cu a pidi pa declara BDO bancarota.

Segun e abogadonan Banco Central den su peticion di bancarota no a cumpli
suficientemente cu e exigencianan. Esunnan cu tin cuenta na BDO ta di un suma total di
885.561.174,29US$. E posicion di debe aki ta keda confirma door di e ex trahadonan di
BDO y tambe ta haya sosten den e concepto di cuenta anual di BDO di 2017. Esaki a
keda traha door di KPMG Venezuela. Finalmente BDO ta pidi corte pa declara e decision
di bancarota nulo.

Cortesia EXTRA.