Page 39 - Djaweps 5 yuli 2018.pdf

Djaweps 5 Yüli 2018 39

For di kolekshon di René
Levy Maduro i Debora
Maduro-de Vries:
Eksposishon ‘Divine
Inspiration; in awe of
Mordechai Rosenstein
and others’
WILLEMSTAD. - Djárason
11 di yüli 8’or di anochi
Sra. Lucille George-Wout,
Gobernador di Kòrsou lo hasi
apertura di e eksposishon
‘Divine Inspiration; in awe
of Mordechai Rosenstein
and others’ na Landhuis
Bloemhof.
E eksposishon lo konsistí
prinsipalmente di litografia
inspirativo di e artista hudiu
Mordechai Rosenstein. E
artista akí a desaroyá un
abilidat pa duna bida na
tekstonan bíbliko, hasiendo
uso di un kombinashon di
kolónan yamativo ku ta
realsá bunitesa di e lèternan
di kaligrafia Hebreo. E
manera di traha akí ta
agregá un dimenshon masha
spesial na su trabou.
Rosenstein su obranan
di arte ta konosí na
diferente parti di mundu.
Por apresiá nan den iglesia,
sinagoga, empresa i serka
kolekshonista privá. E
aspekto multifasétiko di e
artista akí ta resaltá den e
diferente disiplinanan di
arte ku e ta dominá. Aparte
di litografia, Rosenstein ta
konosí por ehèmpel pa su
muralnan, pintura, tapeit
di muraya i su bentananan
di glas den chumbu.
Rosenstein ta duna un toke
kontemporáneo na kaligrafia
Hebreo dor di kombiná su
arte i su kreensia di un forma
pashoná ku otro.
E obranan akí ta salí di
e kolekshon di René Levy
Maduro i Debora Maduro-de
Vries. “Ku e promé mirada
mi a namorá”, asina René
Levy Maduro ta deskribí e
impakto di e promé bes ku
su bista a kai riba un obra
di Mordechai Rosenstein.
“E sintimentu a bira mas
profundo ku kada obra ku mi
a kumpra. Mi ta tin e plaser di
a sera konosí ku Rosenstein
i mi apresio i atmirashon pa
e artista a bira mas i mas
fuerte. E kolekshon ku ta bai
keda eksponé na Landhuis
Bloemhof ta muestra di e
konekshon ku mi a sinti ku
Mordechai Rosenstein”. René
Levy Maduro ta konta.
Rosenstein a diseñá algun
stampia spesial pa Kòrsou
na 1996; pa publikashon
di e promé edishon di e
beibel na Papiamentu i pa
e selebrashon di Lions Club
su di sinkuenta aniversario.
Sigui lesa pagina 46