Page 151 - SAIL ARUBA 2015 & Royal Visit

Jason Gerling: “Nos a haci tur loke ta necesario pa tur hende
gosa y pasa hopi leuk”

Sunday, 19 April 2015 20:03

Proteccion y siguridad durante e realisacion di Sail Aruba 2015 ta sin duda algun un parti esencial.
Aspectonan sumamente importante, ademas di e bienestar di tur participante y bishitante, ta tambe e
presencia di pareha real Su Mahestad Rey Willem Alexander y Reina Máxima.
Pa tal motibo, a crea un comision den cual e miembronan ta representa e entidadnan clave pa loke ta
siguridad, ordo civil y proteccion di publico y facilidad di Aruba Ports Authority, caminda e evento ta
tuma luga.
Jason Gerling como hefe di siguridad di Bestuurskantoor, ta forma parti di e comision aki. E ta duna
splicacion di e trabou amplio cu tin ya caba basta tempo haciendo pa resguarda e siguridad durante e tres
dianan di programa cu ta Sail Aruba 2015. No mester lubida cu tereno di waf ta uno cu ta exigi un nivel di
siguridad masha halto cu standardnan internacional.
Pa tal motibo y e exigencianan pa siguridad di pareha Real, a cuminsa reuni un aña pasa riba un base
semanal. Algun di e entidadnan ta Cuerpo Policial Aruba, Cuerpo di Bombero Aruba, Departamento di
Salud Publico, Aruba Ports Authority, Serlimar y Departamento di Obranan Publico, entre otro.
Tambe a bin delegacion di Hulanda pa sinta y pasa dor di e diferente parti di e programa prepara, como
tambe inspeccion e diferente luga cu e Pareha Real ta bishita. Di e manera aki ta sigura cu ta cubri tur
aspecto y ta prepara di e manera mas adecua.
“E preparacionnan ta den estado final. Nos ta bay haci algun entrenamento pa sigura cu tur cos ta bay ta
bon,”asina Gerling a duna di conoce. E experto den siguridad a duna di conoce cu e ta hopi satisfecho cu
e trabou den ekipo y responsabilidad demostra pa tur e stakeholders envolvi.
Finalmente, Gerling a haci su invitacion na pueblo di Aruba pa atende actividadnan di Sail Aruba 2015
confirmando cu no tin motibo pa preocupa y por djis disfruta di e experiencia. “E ta bay ta un actividad
caminda nos a sigura cu nos a haci tur loke ta necesario pa tur hende gosa y pasa un dia hopi leuk,” el a
duna di conoce.
En berdad ta anticipa e presencia di un cantidad masha grandi di hende teniendo na cuenta cu tambe ta
realisa aki e tan popular Opendag di Marinierskazerne. “Nos a percura pa pone atencion riba tur area
necesario pa tur hende por ta trankil. Ta bay tin personal amplio reparti riba e tereno,” Gerling a finalisa
bisando.