Page 69 - KPA DEC 2,2015

PAGINA 16 DIARIO DIARANZON 2 DECEMBER 2015

Rijbewijs y auto
a wordo kita
di chauffeur
burachi

ORANJESTAD (AAN):
Ta parce cu tin patruya
den tur skina ya cu a base
di informe di polis por
constata cu esnan cu ta
patruya, particular durante
oranan di anochi y marduga
ta atento y ta actua mesora.
Tabata dialuna den careda di
tres’ or di marduga durante
cu patruya di Oranjestad
tabata core vigila den Caya
Ernesto Petronia, cu nan a
wak na altura di e rotonde
na altura di Piet’s cu chofer
di e vehiculo Toyota Yaris
cora A-4293 tabata core pa
su cuenta riba Professor
Lorentszstraat.
E chofer tabata core den
direccion pariba y yegando
na e rotonde el a bira bay
zuid direccion Irausquin
plein. Relaciona cu esaki ,
polis a duna e chofer señal
pa para pero na prome
instante e no a cumpli.
E chofer a continua su
caminda den direccion
zuid y a subi parkinglot di
“Circle K” y a bira na man
robez y a sigui direccion
nort riba Irausquin plein.
Un biaha mas polis a bolbe
duna e chofer señal pa para
hasta usando zwaai licht,
sirena di auto di patruya y
uso di sirena cu zwaai licht
.
Esaki tabata tin su efecto y
a pone e chofer reacciona
y para. E chofer a para
na altura di Misa San
Francisco.
Tabata trata di e homber di
inicial A.O.P.S. naci na Peru
di 45 aña. Polis a constata
cu e tabata papia cu “doble
lenga” y su rosea tabata
hole na bebida alcoholico.
Relaciona cu e hechonan
constata polis a detene e
chofer y a transport’e pa
warda y present’e dilanti
fiscal auxiliar.
Test di rosea di e sospechoso
a sali negativo p’e.
Relaciona cu e resultado a
hala aden su rijbewijs. Tanto
yabi y auto di sospechoso
a wordo poni na warda di
Oranjestad na disposicion
di e doño.