Page 21 - Diario

DIAMARS 22 SEPTEMBER 2015 DIARIO PAGINA 21

El vals de las
mariposas

Mi ta tin apenas 5 aña ora cu mi a haci doño di un
tocadisco bieu cu mi mama a benta afo. Cu nada pa toca mi
mama a regala mi un disco 45 rpm "El Vals De Las Mariposas"
cu pa oranan largo mi tabata sinta wak ta draai y draai. Mi so
den mi propio mundo liber di preocupacion y den un estado
di fantasia cu ta solamente como mucha nos por experiencia.
Henter dia e palabranan di e cantica: " Paseando en tu jardín
1000 mariposas ..." tabata resona for di mi camber. Mi ta tin
tur hende loco ta toca e mesun disco dia den dia afo.
Awe, hopi aña despues, como hypnotherapista, e
ta facil pa comprende dicon mi obsesion cu barbulet te na
e punto cu te hasta e logo di Aruba Hypnosis Center ta un
barbulet cora. Manera mi a splica den varios articulo, un di
e maneranan cu nos mente subconsciente por wordo impacta
(influencia) ta door di ripiticion y mas jong nos ta, mas habri
nos mente subconsciente ta pa sugerencia. Cu mi a tende e
cantica miles di biaha sigur ta tin su impacto y por splica
diferente cos.
Recientemente Fundacion E Brug a presenta e
pelicula "Journey of the Butterflies" presentando un di e
misterio mas grandi di naturalesa di miyones di barbulet
Monarca (Monarch butterfly) cu hunto ta cuminsa un odisea
trans-continental di 4000 km y ta bula for di Canada via
Merca pa Mexico caminda nan ta pasa winter.
Un bichi chikito pa di 5 biaha ta laga bay di su cuero
y ta cuminsa e proceso yama metamorfosis caminda e ta
transforma den un pop pa despues aparece completamente
diferente y sin ningun rastro di tabata bichi. Awo, mas of
menos 10 centimeter grandi y di color oranje, preto y blanco,
e la cambia pa un barbulet cu nomber di un noblesa (Monarca)
cu pronto lo cuminsa un biahe di miles di kilometer.
Cientificonan ta completamente babuca con
e Monarca ta bula y zweef, sobreviviendo mal tempo,
enemigonan natural, calor, friu y hopi mas y ta yega seronan
nan na Mexico siendo cu nunca antes nan a haci un vuelo
asina.
Aunke e barbulet Monarca ta nativo di hopi pais (na
Aruba mes tin Monarca) ta solamente esunnan cu ta biba na
Canada y e parti noord di Merca tin e tendencia migratorio
aki cu no ta caba te ora cu nan yega Mexico. Nan odisea ta
parti den un ciclo cu a cuminsa 3 generacion prome ora cu
nan bisawelonan a sali for di Mexico na fin di winter. E prome
generacion ta yega na haltura di e estadonan Golfo caminda
nan ta pari webo (despues ta muri) cu ta bira bichi cual ta
transforma den Monarca y ta continua nan biahe direccion
noord. Esaki ta sosode tres biaha (cada generacion bibando
pa un luna) bayendo cada bes mas noord te yega Canada.
E di 4 generacion ta biba casi 9 luna y ta esun cu ta haci e
biahe epico y ta bula di Canada bek pa Mexico, e pais di su
bisawelonan.
E barbulet ta ser considera un di e animalnan mas
magnifico di naturalesa. Su mahestuosidad y bunitesa ta hacie
un simbolo popular pa simbolismo. Pa ambos Cristianismo
antiguo y mitologia Griego e barbulet ta simbolisa e alma
humano. Den hopi cultura e barbulet ta simbolisa bunitesa,
resureccion, transformacion, liberacion, felicidad y alegria.
Den naturalesa sa tin cierto especie di animal cu
como excepcion no tin e mesun color cu e resto di e especie.
E Monarca cora ta un ehempel di esaki. Esaki ta motibo cu
nos a dicidi di uz'e como e logo di Aruba Hypnosis Center. Pa
nos e Monarca cora ta e logo perfecto y ta refleha 3 cos: 1. E
libertad cu nos clientenan ta haya di laga bay di un mal habito
cu a stroba nan progreso pa hopi tempo. 2. E metamorfosis di
un bichi pa un barbulet cual perfectamente ta simbolisa con
un persona cu cambia di pensamento ta cambia su bida.
3. E teoria "butterfly effect" cu ta identifica cu un cambio
chikito (por ehempel e movecion di e hala di un barbulet su
efecto den atmosfera por crea un horcan) por tin un efecto
enorme ariba un persona. Den nos practica hopi biaha nos
a constata cu un sesion di hypnosis (pa stop di huma por
ehempel) ta inicia accionnan positivo den hopi otro area den
bida di e cliente.