Page 18 - KPA MARCH 22,2016

Intrusonan agresivo a mara Reina di Carnaval
den su cas pa asina reboltea tur cos

Publication: Monday, 21 March 2016. Categoria: Policial
Polis investigando exactamente kico nan a bay busca den cas na Palm Beach

ORANJESTAD (AAN): Kico e intrusonan aki tabata realmente? Nan tabata ladron enbusca di cos
di balor? Of tabata buscando algo otro, y pesey a reboltea tur cos cu a haya, incluyendo paña?
Autoridad tin dilanti nan awor, un caso serio pa investiga pa asina haya sa exactamente kico a
socede.
Hecho ta, cu situacion a para bira cu awor tur ciudadano tin di controla rond di cas prome cu
drenta, y percura pa bo tin Alarma activa constantemente, of a lo menos bo tin un keyfob den
bo man cu un “Panic Button” poni riba dje. Hasta ora bo ta na cas!
Loke a pasa Diasabra anochi despues di 7’or, tabata algo di lamenta. Aruba su recien corona
Reina di Carnaval 2016, a bira victima di loke na ingles ta ser yama “Home Invasion Robbery”.
Te banda di 7:30 pm, a drenta informe via Central di Polis cu na Palm Beach 420, un persona
den e cas ta mara y Polis tin di bay na e adres cu urgencia.
Na caminda pa e cas, den vecindario di e adres, Polisnan a topa un auto cual su chofer a hala
atencion, y indica na e patruya pa sigui su tras pa yega na e adres.
Na yegada, a bin haya sa cu e chofer femenino ta e mama di e victima di inicial S.C. di 18 aña,
kende na Januari di e aña aki a ser eligi como Reina di Carnaval 2016.
E momento cu Polisnan a drenta den e cas, nan a wak con tur caminda, tanto den cushina,
comedor , sala, tin monton di paña como tambe articulonan na suela.
Den e sala tras di e Sofa grandi, nan a bin haya e dama drumi na suela, keto bay cu su man y
pianan mara cu paña blanco.
Mesora Polis a los e paña blanco, pa asina alivia e Reina di Carnaval di su situacion precario y
susto, y a braza su mama. Pero pa Polis tabata importante pa a haya informacion
inmediatamente for di dje, pa sa den ki trauma el a caba di pasa aden na man di e
malhechornan.
Debi na e spanto y su nervio, Polis a pidi presencia di Ambulans como tambe Slachtoffer Hulp
pa acudi na e adres.