Page 35 - HOSPITAAL

Tambe nan ta spera cu e hospitalnan ta traha hopi mas di cerca cu otro. Nan a cera cabes
y lo traha conhunto di cual e acuerdo aki ta simplemente e comienso. Tin hopi trabou pa
haci, pero por saca hopi beneficio di dje riba e tereno medico.

Dr. Gilbert Martina, Director General di Hospital Nobo Otrobanda (HNO) a duna di
conoce cu e acuerdo aki ta sumamente importante, unda ta determina 4 area di trabou riba
tereno di cuido medico.

Tur hospital lo traha hunto pa mehora e servicio, calidad y seguridad pa paciente, pero
tambe e parti farmaceutico y e parti di educacion y informacion di tur empleado.

Dor di e acuerdo di cooperacion e islanan por intercambia cu otro experencia, idea,
trayectonan cu nan a pasa aden.

Por ehempel Hospital di Aruba ta pasa den e trayecto di traha un edificio nobo di cual na
Corsou tambe ta pasando den dje pa un hospital nobo.

E parti di seguridad y calidad pa pacientenan tur ta para p’e, dr. Martina a duna di
conoce.

Esaki ta un parti cu nan por comparti protocolnan hunto p’asina nan por siña di otro y
kico tur nan a pasa aden, adapta esaki si tin mester pa sigui bay dilanti den cuido medico.

Dr. Franke Scheper, Director Medico di Stichting Sint Elisabeth Hospital (SEHOS), a
traha na tur isla den e area medico y por bisa cu mayoria tin e mesun tipo di pregunta di
cuido y desafio. E desafio grandi ta cu mester duna un bon cuido di calidad y seguridad,
un cuido responsabel den e cuadro financiero cu tin. Esaki ta nifica cu e trabou no ta facil
y mester traha mas hopi hunto y ta algo cu profesionalnan ta bezig cun’e awor, asina dr.
Scheper a duna di conoce.

Nan mester yega na un nivel halto manera hospitalnan rond mundo y p’e hospitalnan aki
traha hunto unda cu e profesionalnan laborando den e hospitalnan cu a firma e acuerdo
aki lo sigui haci esaki.