Page 32 - Extra 5 dec,2015

Djasabra 5 Desèmber 2015 33

CHARLA ENTREGA BUKI SUR SWINDA
“KRISTU TA MI FORSA”

Boneiru, 24 novèmber 2015 Valdemar Marcha

Despues di su konsagrashon Sùr Jeanne-Marie a bolbe nos
islanan i a sirbi komunidat den diferente funshon i tipo di aktividat.
Siendo un religioso el a traha entre otro na Hospital San Francisco
i tambe Cas di Sosiegu kaminda su amor pa su Dios i su pueblo
a yud’é trese hopi sosten i alivio pa e klientenan. El a gana hopi
apresio di su pueblo ku spontaneamente a dun’é e nòmber di kariño
i amor Sùr Swinda. Ku su amor kontagioso, gran inteligensia i forsa
legendario el a logra diferente proyekto grandi pa su isla.

E mes ta konfirmá esaki ku e dicho: “Tur kos mi por den Kristu
ku ta dunami forsa”.

Sùr Swinda a heredá kas di su mayornan i a pone esaki bou di
Mariadal pa asina kontribuí ainda mas na kuido di grandinan. E kas
aki ta karga e nòmber Ka’i Mimina komo homenahe pa i rekuerdo
di Wilhelmina (“Mimina”) Seraus.

Sùr Swinda su pashon no tabata solamente di un índole religioso
i soshal, pero el a lanta i krese semper ku un amor grandi i kontinuo
pa entre otro agrikultura. Un prueba konkreto di esaki ta e kunuku
ku gobièrnunan di tantu Boneiru komo Hulanda a yuda Sùr Swinda
konstruí. Un lugá grandi i produktivo ku ta trese alimento material,
emoshonal i spiritual pa tur esnan ku pasa algun tempu einan ku
nan aktividatnan di plantashon, meditashon o orashon.

Pa su trabounan kontinuo i ehemplar pa pueblo di Boneiru,
Sùr Swinda a risibí kondekorashon di Kas Real Hulandes i
rekonosementu di diferente organisashonnan soshal na Boneiru.

Sùr Swinda ta un leyenda bibu. Un ehèmpel grandi i balioso
pa kada un di nos ku ke hiba i biba un bida di dedikashon na Dios
i próhimo.

E publikashon aki ta un simpel buki di amigunan, ku relatonan
kòrtiku di algun amigu ku ke rekonfirmá e gran apresio ku ta
biba den komunidat pa persona di Sùr Swinda; un muhé balente
desendiente di un linea grandi i fuerte ku a sa di duna guia, kuido
i amor inkondishonal na míles di esnan den mas nesesidat den
e komunidat di Boneiru. Su bida ta un testimonio di e loke su
superior a splika na su konsagrashon: un bida hopi duru pero suave
alabes manera Mateo 11, 29 i 30 ta siña nos.

“Tuma mi yugo riba boso skouru i siña di Mi, pasobra Mi ta
mansu i humilde; i boso lo haña sosiegu. Pasobra mi yugo ta suave
i mi karga ta lihé”.

Nos trabou pa produsí e buki a bira posibel danki na koperashon
di un gran kantidat di persona ku lo ta hopi pa menshoná tur na e
okashon aki. Pero, mi kier a hasi un eksepshon i gradisí Boi Antoin
i tambe BONDRIGO pa e hecho ku nan a finansiá tur kos.

Permití mi terminá ku un orashon ku Obispu di Willemstad Mgr.
Luis Antonio Secco a skibi i dediká na Sùr Swinda Seraus pa e
okashon aki:

“O Dios Tata, Kreador di universo, Tata yen di amor i miserikòrdia,
pa medio di Hesu Kristu, Bo Yu, Bo a duna hende e pordon i e regalo
inmenso di salbashon.

Bo a yama San Francisco ku a sigui Hesus riba e kaminda di
pobresa i di amor pa Dios, pa hende i pa tur kriatura, pues pa esnan
mas humilde.

Bo a yama Sùr Swinda pa brasa e karisma di San Francisco, pa
asina e risibí e grasia di un entrega na Señor den pobresa, kastidat
i obediensa.

Bendishoná Sùr Swinda,dun’é legria di ta siguidó di Hesus segun
e spiritu di San Francisco.

Bendishon’é pa e añanan di su bida konsagrá, bendishon’é pa
tur e trabounan realisá komo religioso den su komunidat na fabor
di hende pober, humilde i den nesesidat.

Sùr Swinda,
ku Dios tata bendishoná bo
Ku Dios Yu konsolá bo
Ku Dios Spiritu Santu yena bo ku pas i Su amor.
Amèn.
*Na Kòrsou por kumpra e buki pa Ang.20 na Kas di Beibel