Page 10 - AAA 14 DEC 2015

Algun pasahero den panico ora cu mester a evacua avion

Publication: Monday, 14 December 2015. Categoria: General
Alarma bati riba pista pa Fokker 50 di InselAir

ORANJESTAD (AAN): Diadomingo pa 2:31’or di atardi, alarma grandi a keda activa na
Aeropuerto Internacional Reina Beatrix ora cu capitan di avion Fokker 50 di InselAir Curacao a
raporta cu den cockpit tin indicacion cu e motor lo ta na candela.
Di biaha Airport a cera pista y tabatin varios avion cla pa aterisa y nan a ser manda pa Curacao.
E crash trucknan di Cuerpo di Bombero a subi pista di biaha mobilisa pa e avion di Insel Air cu
tabata na taxiway pabao cla pa lanta vuelo.
Di biaha e bomberonan a yuda e crew di InselAir pa evacua e pasaheronan, aunke no tabata mira
nada di huma ta sali for di e avion ni for di e dos motornan PW100, esta fabrica pa Pratt &
Whitney Canada. Pero a opta pa evacua pasaheronan, pa seguridad.
Ambulancenan di ImSan tabata riba un standby riba pista na Airport debi cu tabatin algun
pasahero a drenta panico y sinti malo di e sucedido.
Tabatin alrededor di 50 pasahero y baby abordo di e avion cu ya a haya Clearance pa sali riba e
vuelo di Aruba pa Curacao.
DIARIO a compronde cu tecniconan di InselAir a yega na e avion di biaha riba pista, pa asina
inspecciona e motor despues di e señal cu a keda ricibi den cockpit cu lo tin candela.
Pero durante e control no a mira nada kima y nada iregularidad den e motor. E por ta djis un
false alarm, y un faulty-switch.
Bus di Airport a busca e pasaheronan y hibanan paden na Airport den sala di espera. E avion a
keda getow hiba dilanti pa un control completo y tecniconan a constata cu ta un señal falso a
keda duna y tur cos tabata na orden cu e motor y e avion mes.
Pa 3:05’or di atardi Airport a cancela e alarma y asina habri pista back.