Page 7 - AM210524
P. 7
Dialuna, 24 Mei 2021 AWEMainta 7
Dama chauffeur manehando bou influencia
a causa accidente na Paradera
Diabierna algo prome cu mey anochi a sosode un
accidente riba e caminda di Paradera, un poco mas
pabou unda antes tabata Pacifico Bar/Restaurant.
Tabata trata di dos auto Hyundai y ambos auto tabatin
dama como chauffeur. Un di e damanan a resulta
levemente herida, despues di e impacto.
E accidente a sosode momento cu un Hyundai
bayendo direccion Piedra Plat a hala na su man robes
y ta dal na banda di e Hyundai bayendo direccion di
MFA Paradera.
Chauffeur di e Hyundai bayendo direccion MFA
Paradera t’esun cu a resulta herida. Tire banda robes a
wordo ranca por completo dor di e Hyundai bayendo
direccion Piedra Plat.
Polis na su yegada a constata cu e dama cu a causa e
accidente ta bou influencia y a bise su derechonan y
cu a ta wordo deteni pa core auto burachi.
Mientrastanto ambulance tabata yegando di banda di
pabou pa atende cu e chauffeur herida, cu a keda den
auto sinta.
Paramediconan na yegada a papia cu e chauffeur
herida y a splike kico nan ta bay haci pa sake di e
vehiculo.
Despues cu el a wordo saca nan a pone den ambulance
y a sali direccion Hospital pa un control mas extenso.
