Page 35 - MIN.OTMAR ODUBER MAY 7

32 AWEMainta Diahuebs, 07 Mei 2015

Fundacion Concierto
Dominical Donny Lacle

Tur esnan
presente a
disfruta di un
bunita concierto
diadomingo dia
26 di april 2015

DIA 26 di april ultimo a tuma lugar den The French Steak

House di Manchebo Beach Resort & Spa, e famoso Concierto
Dominial Donny Laclé. Como cu 26 di april nos Padú a
cumpli 95 aña a dedica un parti di e concierto na Padú y su
musica. Lamentabelmente Padu mes no por tabata presente

E concierto a habri cu José David y Grupo Union, consistiendo
di José David cantante y e guitaristanan Andy Gomez, Remi
de Lange y Jairo Croes. Nan a presenta canticanan cu José
David mes a compone. Entre otro un cantica cu el a toca pa e
tempo ey “Reina” Beatriz, na ocasion di su bishita na Aruba,
y dos cantica cu cua el a gana e Festival un Canto pa nos
Himno y Bandera na aña 2005 y e aña aki. Specialmente e
mensahenan di su canticanan a capta hopi atencion.

E grupo Norman Arends y sus Amigos, consitiendo di tres
cantante Anette Wongsosemito, Mylène Arends y Roy
Sneek y e guitaristanan Ilse Tjen-A-Kwoei, Norman Arends,
Robert Solognier y Carlos Faarup a percura pa un programa
special, masha bunita, cantando y tocando musica di Padú:
Canticanan menos toca y di diferente genero manera:
”Ayera” (bolero), “Mi n’ sa” (wals), “Nunca” (jazz), “Ban
baila e dansa” (dansa) y algun mas. Realmente un bunita
homenahe na Padú.

E ultimo grupo cu for di prome momento a trece un ambiente
tremendo tabata Tipico Amicales, bou guia di Maldo Marin.
Su grupo ta consisti di 6 integrante tocando varios
instrumento. Maldo mes a toca mandolin, Jeanette Boezem
a canta hunto cu Roberto Orman, kende tambe a toca wiri,
Mando Koolman a toca guitara tre, Roy Croes, quinto y Michi
Hernandez baho. Nan ta toca musica tipico y di e paisnan
rond di nos. Nan a toca entre otro “Abo so”, Ayo mi Dudu”..
Apenas nan a cuminsa toca ya diferente pareha a cuminsa los
e pianan, unda cu tabatin lugar den e restaurant. tremendo
ambiente! Cierto momento Tipico Amicales a interumpi nan
presentacion pa hunto cu tur esnan presente canta Happy
Birthday y Cumpleaños Feliz pa Padú kende via Skype a
scucha nos na su cas. Naturalmente e tabata un sorpresa
p’e y el a keda masha contento y via Vivian, su yiu, el a laga
gradici nos tur.

Den pausa a pasa rond e cu caha di glas den cua esnan
presente a haci un donacion pa e Fundacion Donny Laclé pa
Musico Hoben y Talentoso, cu na su turno fin di aña ta yuda
diferente musico hoben financieramente cu nan estudio di
musica. E concierto di e luna aki ta tuma lugar 24 di mei,
pues no e ultimo diadomingo manera di custumber, for di
11.00 or pa 13.00 or. Entrada ta gratis.