Page 97 - MIN VOS - JUNI 16,2015

Jeritza van Vliet lo papia tocante su proyecto riba maneho di
Diabetes na Aruba

Publication: Tuesday, 16 June 2015. Categoria: General

ORANJESTAD (AAN) – Matutino DIARIO a entrevista sra. Jeritza van Vliet,
praktijkondersteuner na Hulanda, ken ta bezig cu un proyecto tocante Diabetes aki na Aruba.
Sra. van Vliet tin 41 aña ta bibando na Aruba y como profesional diploma, e tin amplio
trayectoria y experiencia riba tereno diabetico na Hulanda, unda un team completo ta zorg pa e
pacientnan.
Na dado momento el a haya e necesidad di bin Aruba unda e ta sinti su mes hopi util den e rama
aki, pa inicia un proyecto den cual e ta traha boluntariamente.
Actualmente, sra. van Vliet ta yudando dos docter di cas cu nan pacientnan diabetico, riba
control di nan malesa, splica nan kico ta diabetes y con nan tin cu cuida nan curpa y mantene e
sucu na un nivel adecua.
“Cu e proyecto mi kier mira si e manera con e pacientnan diabetico na Aruba ta bon guia y si nan
ta cuida na cas y tin mihor resultado. Esaki ta encera tuma nan remedi na ora, manera docter ta
prescribi, haci movecion y paga atencion na cuminda.
Tambe e proyecto ta encera splica e pacientnan kico ta e consecuencia si nan no cuida nan salud.
Aki na Aruba tin hopi hende cu nan ta kita pia anualmente, esta un average di 150 pa aña. Esaki
ta un di e motibonan cu mi a cuminza cu e proyecto aki” sra. van Vliet a señala.
Sra. van Vliet a expresa cu tur hende merece un bon cuido di salud, y compara cu Hulanda, cu ta
un pais hopi mas grandi, na Aruba mas hende ta kita pia, y un hende cu kita pia tin expectativa di
bida di cinco aña.
“ Esey ta nifica cu e pacient no mester cana pia abao, mester corta huña recht, controla bo pia tur
siman si no tin herida, si bo pia ta cambia di color, si e ta cambia di temperatura, si bo tin hopi
cayo bay un pedicurista experto den pia diabetico, pasobra bao di e cayo por tin un herida.