Page 8 - AWEM 060515

8 AWEMainta Diaranson, 6 Mei 2015

Minister Dowers relaciona cu problema na KIA

Ta na mesa mester busca solucion y
no confrontando otro

DESPUES di reuni cu sindicatonan cu ta representa trahadornan

di e instituto coreccional KIA, e titular encarga cu Husticia mr. drs.
Arthur Dowers a dicidi di bishita e instituto aki y mira pa su mes
con e situacion ta.
Manera ta conoci, na momento cu e maneho di KIA a wordo poni
den man di Trudy Hassell, a introduci cierto regla pa cu “ziekte-
melding” cu a trece basta discusion y malcontento bou di e mesun
trahadornan.
E discusion mes ta bay riba e procedura cu a introduci na momento
di meld ziek, si esaki t’esun corecto y conforme ley di ambtenaar-
nan.

“Mirando cu loke ta riba papel ta creando cierto incertidumbre
cerca e trahadornan, pa haci algun adaptacion chikito na cierto
lugar,” Minister Dowers a duna di conoce.
E mandatario a señala cu hunto cu su conseheronan a scucha e
partidonan apart y e siguiente paso ta pa trece nan tur hunto na
mesa “pa mira si nos por sali di e situacion, ya cu pa por maneha
un organisacion unda cu tin hopi hende ta traha y tambe tin hende
interna, ta hopi importante pa garantisa trankilidad y harmonia
cu mester existi den e organisacion,” Dowers a duna di conoce.
Y a agrega cu na momento cu tin dos partidonan para contra otro,
confrontando otro, e no ta duna resultado cu Gobierno kier.
Pesey como e mandatario responsabel p’e instituto, el a haci un
apelacion na tur partido envolvi pa keda trankil.

“E punto di salida cu tin te aworaki ta cu e medidanan cu ta wordo
tuma a wordo haci tin na bista e mehoracion e condicion den
prizon y mehoracion di e servicio cu nos ta brinda. Sigur nos tin
comprension ora cu un trahador ta bisa cu tin hopi cos ta pasa di
biaha y ta trece tin biaha poco incertidumbre.
Mi por compronde tambe cu ora cu tin cosnan nobo, ora tin cam-
bio, no tur ora tur hende ta di acuerdo cu esey. Riba e forma di e
cambio tambe tabatin hopi remarca riba dje.
Mi no ta kere cu esey por wordo soluciona confrontando otro. E
unico manera ta sintando na mesa.”
E mandatario a sigura cu e ta den e proceso di scucha trahadornan,
sindicato y gerencia, sperando cu pronto por pone tur partido na
mesa pa continuidad di maneho di e institucion.